(Aruba) Ainda e sancionnan riba Citgo no a wordo lanta door di autoridadnan Mericano

Den e contexto di e situacion di Venezuela, Minister Presidente a toca e tema di e refineria tambe, den conferencia di prensa di Diahuebs.
Ainda e sancionnan no a wordo lanta door di autoridadnan Mericano. Prome Minister mr. Evelyn Wever-Croes a señala cu autoridadnan Mericano ta hopi stricto pa lanta e sancionnan y cu nan kier cierto garantianan, y esaki ta un asunto cu gobierno ta trahando riba dje, of alomenos impulsando Citgo pa hacie, pasobra gobierno riba su mes no por traha riba e exigencianan aki.

E condicionnan of exigencianan ta dos. Prome Minister a menciona nan: e prome ta cu e sancionnan ta wordo lanta temporal y parcialmente pa termina e fase dos, cu condicion cu no ta bay den man di esnan cu ta riba lista di sancion, y di dos ta cu e placa cu wordo designa ta pa paga e empleadonan cu ta na trabao y esnan cu a perde nan trabao.

Prome Minister a splica cu si no cumpli cu e exigencianan di Gobierno di Aruba, si PDVSA of Citgo no por duna Aruba e garantianan aki, anto gobierno di Aruba no por haci mucho mas pa nan, pasobra e ta haciendo su esfuerzo pa lanta e sancionnan, y nan kier sa kico ta haci cu e placa despues y esey no ta aceptable pa gobierno di Aruba.

Pa gobierno di Aruba, e dignatario a subraya, e trahadornan ta na prome lugar. Gobierno a yuda nan cu e aspecto di belasting riba e lumpsum cu nan a haya pero lamentablemente si e situacion sigui asina, hasta e fase 2 lo por wordo lubida.

Prome minister a señala cu esaki ta hiba gobierno na wak kico ta bay pasa cu e refineria, y aki dos siman e lo ta biahando pa New York, pa reunionnan na ONU riba e tema di Derecho di Hende Muher, y mesora el a pidi un cita cu e abogado encarga cu e caso di e sancionnan pa e papia tambe riba esaki.

Prome Minister ta kere cu e circumstancianan nobo aki ta trece gobierno mas cerca di tuma un decision.

Fuente: Con información de Diario de Aruba