(Aruba) Mas negoshi cu por kere ta haci triki di placa cu clientenan Venezolano

Tocante e “mercado negro” cu a habri na Aruba pa e Venezolanonan cu por beneficia di dje, Matutino DIARIO a ricibi reaccion di un fuente di informacion, cu a splica nos un tiki con esaki ta funciona.

T’asina cu den cierto establecimentonan unda clientenan Venezolano ta cumpra, nan ta raspa nan carchi pa un suma, ban bisa di 75 florin, pero e compra cu nan a haci ta 10 florin. Kiermen di e diferencia di 65 florin e negoshi ta keda cu 15 florin extra (ora e factura wordo paga pa banco) y e cliente ta haya 50 florin cash.

E fuente a menciona cu no ta parce cu Banco Central por ta controla e desaroyo aki, pasobra e ta sosode den mas negoshi cu nos tur por kere.

Mirando e cantidad di Venezolanonan cu ta biniendo Aruba pa algun dia, y cu no ta keda den hotel sino den apartamento den bario, y cu ta cumpra cuminda durante nan estadia (minimarketnan specialmente), e entrada extra cu e comerciantenan ta haya mester ta basta bon, y mester tin un manera pa e Venezolanonan cambia nan suma di florin cash na dollar na un valor mas halto cu den banco, pasobra si no ta asina e triki aki no tin sentido.

Lo ta pesey cu tin tanto hende ta kere y ta laga sa tambe cu Aruba ta sigui ta un mina di oro?

Hende local cu sa di esaki (mas tanto trahadornan mes) ta keda keto, nan no ta bisa autoridad kico ta pasando den e negoshi unda nan ta traha pa no perde nan trabao. Algun lugar a wordo menciona na nos redaccion, pero nos no tin prueba y pa otro consumidor local mes cu por ta para den rij pa paga den caha na e momento cu un Venezolano ta bezig, ta imposible pa constata kico ta tumando lugar. Y segun e fuente, ta mas tanto e doñonan mes di e lugarnan ta esnan cu ta atende cu e clientenan special aki, na caha.

Fuente: http://www.diario.aw