Grupo di Venezolano na Aruba pa cumpra articulonan di school pa nan yiunan!

No ta usual pa bus chikito core riba Diadomingo pa duna servicio na usuarionan local. Generalmente, mester ta hopi pendiente di e horario di Arubus pa por bin di un of otro distrito pa Playa of viceversa.

No obstante diadomingo cu a pasa varios autobus chikito a core nan respectivo ruta, pa sorpresa di usuarionan local. E motibo ta cu tin un cantidad grandi di Venezolanonan cu a drenta Aruba den fin di siman.

Usuarionan local cu mester a yega trabao, y cu tabata warda Arubus den bushalte, por a subi bus chikito hopi lihe y bin Playa mas tempran, y haya tambe un bus di Arubus pa area di hotel un poco mas tempran cu si nan lo a warda Arubus mes pa bin centro.

E busnan chikito tabata mitar yen caba di pasaheronan Venezolano biniendo Playa, pa bay area di beach, of kizas busca ATM pa saca cen, pasobra tin fuerte indicacion cu hopi di nan a bin busca articulonan pa school, pa nan yiunan.

Diasabra cu a pasa tabata tin cantidad di Venezolano canando den Caya Grandi cu nan maleta, posiblemente nan a haci compra di jeans, keds, flanel, tas, etc., ya cu den e transcurso di e siman aki school ta habri na Venezuela y aya tin scarcedad di tur cos pa school, segun informacion cu Matutino DIARIO a ricibi.

Fuente: http://www.diario.aw