Pa medio di reunion cu PDVSA a obliga gobierno pa revela situacion real

Tanten cu ministernan tabata reuniendo cu autoridadnan na Hulanda, Glenbert Croes (MEP) tabata reuniendo cu Vice Presidente di PDVSA, esta Jesus Luongo. Esaki tabata e di dos reunion entre e parlamentario cu PDVSA y el a bolbe Aruba contento y satisfecho cu un encuentro sumamente positivo.Croes a bisa cu e optimism ta ainda mas grandi cu dos luna y mey pasa ora cu e prome reunion a tuma luga.

Loke ta keda un hecho ta cu si no tabatin e prome encuentro cu top di PDVSA, “nos lo no a haya sa di e interes grandi cu tin di PDVSA den e refineria di Aruba”. El a subraya cu pa MEP no ta importante ken ta habri e refineria, pero cu e refineria ta wordo habri.MEP ta lamenta cu como pueblo tur hende a wordo teni pa gobierno bao di e impresion cu tur e esfuersonan di gobierno a fracasa y no tabatin interes mas den e refineria y e ta gradici na Dios cu el a haya e reunion cu Luongo pa asina haya sa e status real di e situacion.

E ta un hecho grave cu pueblo a wordo engaña y pa dos aña tabata keriendo cu no tin interes den e refineria, el a remarca.“Despues di e anuncio cu m’a haci di e resultado di e prome reunion cu PDVSA aworaki bo tin gobierno cu tambe danki Dios ta canando den e caminda, nan ta canando via CITGO,” Glenbert Croes a expresa, “M’a bay papia cu PDVSA, bo mester weita e structura; PVDSA ta e tata di tur e filialnan di PDVSA, CITGO ta manera un yiu di e tata ey cu yama PDVSA.

Gobierno a opta pa bay cerca e yiu, ami a opta pa bay cerca e tata. Na final di dia pa CITGO a haci algo, PDVSA mester bay di acuerdo, pa PDVSA haci algo Presidente di Venezuela mester bay di acuerdo.”Croes a bisa enfaticamente cu Aruba ta bibando momentonan positivo y crucial pa logra reapertura di refineria y cu hecho ta cu como parlamentario e no por firma ningun acuerdo, y ta keda den man di gobierno pa haci loke nan tin cu haci pa e procesonan por sigui y e refineria por habri bek.

El a ripiti cu no ta import’e ken ta haya of tuma e credito.Glenbert Croes a bisa cu e ta priminti di sigui vigilante y alerta pa sigura cu gobierno sigui cana e caminda sincero y determina pa habri e refineria.El a bisa cu no ta compronde pakico gobierno mester bay Hulanda pa consulta gobierno eynan pa cu un decision, pero si e ta spera cu na Hulanda por a convence gobierno cu e reapertura di e refineria ta necesario pa Aruba y ta den interes di e pueblo di Aruba.Croes a comenta cu loke e kier ta pa gobierno caba e trabao y firma e acuerdonan.

El a bisa cu el a wordo informa tambe di parti di PDVSA di e contactonan cu CITGO cu gobierno y el a comparti cu Luongo cu e apoyo cu tin na Aruba pa e reapertura ta abrumador y un 71% di esunnan cu a vota den un encuesta a expresa nan sosten na e reapertura.E parlamentario su mensahe finalisando, na gobierno ta: “Un cos ta sigur, nos lo ta e rosea cayente di nos pueblo riba boso lombanan pa sigura e biaha aki boso no engaña e pueblo un biaha mas, boso no traiciona e pueblo aki un biaha mas, boso habri e refineria ey como cumplimento cu boluntad di un pueblo.”

Fuente: http://www.diario.aw