Diario de Aruba: Posicion di Aruba den negociacion Citgo lo a empeora

Un situacion sumamente serio ta presenta su mes pa Citgo pero tambe pa Aruba, cu ainda tin un relacion comercial cu e compania Venezolano.
Dialuna Corte Superior di Merca a duna rason na e compania minero Canades y esaki ta nifica cu Crystallex tin poder awor pa uza Citgo of parti di Citgo como pago pa e debenan cu Gobierno di Venezuela tin cu e compania.

1.4 Biyon Dollar ta loke Venezuela mester paga na Crystallex si e kier evita di perde Citgo of parti di Citgo na findishi.

Ni Venezuela ni Crystallex a duna comentario ayera riba e decision di Corte Superior di Merca. Den e caso en cuestion, Guaidó a haya oportunidad di expresa su mes pero loke Crystallex a expresa a haya confirmacion.

Awe Guaidó por yama su mes Presidente Interino pero e no ta goberna na Venezuela.

E hecho cu e ta wordo reconoci como Presidente Venezolano dor di Merca a haci cu e por uza Dos Miyon di Citgo na Merca pa paga pa asistencia entre otro hudicial dor di profesionalnan cu el a tuma den su servicio pa proteha entre otro Citgo.

Kico e situacion actual ta nifica pa Aruba, cu ta den negociacion ainda cu Citgo, no ta conoci. Si ta un hecho cu futuro di personanan y instancianan cu mester haya placa di Citgo na Aruba ta na duda mas grandi.

Na fin di October PDVSA mester paga 900 Miyon pa e prestamo 2020 tambe. Si esaki no sosode, Citgo ta perde e compania na e grupo di financiado.

Informacionnan ta indica cu Aruba, cu ta den combersacionnan cu Citgo mester acelera e proceso. E situacion pa negocia ta empeora, pasobra cualkier momento Citgo no ta di Venezuela.

Den prensa internacional varios posicion di Citgo a wordo menciona. Hasta a wordo bisa cu Citgo por dicidi pa bati bankroet.

“Kico Guaidó por haci cu 2 Miyon enfrente e situacion actual?” ta pregunta cu informantenan a lansa na DIARIO.

Fuente: Con información de Diario de Aruba