(Aruba) Minister Presidente a reitera y enfatiza cu e frontera cu Venezuela ta keda cera

Gobierno a yama su prome conferencia semanal Dialuna, cu presencia di Minister Presidente mr. Evelyn Wever-Croes y Minister di Husticia mr. Andin Bikker.
E prome tema di agenda di Prome Minister ta e situacion di Venezuela, cu ta un asunto hopi delicado, y ciere di frontera, pero e mandatario a reitera cu e frontera ta keda cera.
Gobierno ta trahando riba un peticion di Aruba Airlines pa yega na un tipo di excepcion, locual el a menciona siman pasa tambe. No obstante, e dignatario a bisa cu el a ripara cu tin algun confusion den comunidad.

Prome Minister a splica cu gobierno no a duna e excepcion aki ainda, pero nan ta trahando riba dje. E mandatario a relata cu Aruba Airlines a haci un peticion na Gobierno, pa nan por haci vuelonan di transito di Venezuela pa Merca, via Aruba. E compania ta indica cu esaki ta mehora e situacion di e compania y e destino di e 200 tata y mamanan di famia cu ta traha eynan, no ta core peligro.

El a señala cu si gobierno bay di acuerdo cu esaki e pasaheronan cu haci uso di e oportunidad aki ta keda literalmente di transito na Aruba pero nan no por keda na Aruba. Y solamente esnan cu tin Visa pa por drenta Merca lo wordo permiti pa subi avion na Venezuela. E ora ey no tin ningun discusion si nan por drenta Merca of no.

Tambe nan lo wordo pidi pa firma un tipo di declaracion cu nan no ta bay pidi un tipo di asilo of alto asina na Aruba. Si gobierno ta hacie esaki ta pa un periodo di prueba pa wak con e ta bay, y si ta bay bon lo evalua pa otro periodo di prueba mas.

Importante ta cu Aruba Airlines a saca un man indicando cu si nan no haya ayudo nan ta bay confronta un problema financiero.

“Pero laga nos ta hopi cla. Ningun aerolinea cu ta bula via Venezuela por conta riba e ruta aki, pa e por ta algo viable of no. Pasobra ta varios compania local y otro aerolineanan cu tabata bula rutanan for di Venezuela, den bon temponan, cu no tabata tin frontera cera, y asina mes nan a bay bancarota pa motibo di no a haya e placa cu mester a haya ayanan”, Premier Wever-Croes a señala.

El a reitera cu gobierno ta evaluando pa haci un excepcion pa un periodo di prueba pa yuda e compania y asina evita cu mama y tatanan di famia nan pan ta core peligro. En todo caso, na un forma contundente e dignatario a subraya cu e frontera ta keda cera.

Fuente: Diario de Aruba