Diario de Aruba: Islanan Hulandes den Caribe a tene cumbre pa papia di migracion y crisis na Venezuela

Dialuna a tuma luga e di tres reunion tripartiet entre e Premiernan di Aruba, Curaçao y Sint Maarten. Riba e agenda tabata tin varios punto, entre otro migracion, crisis na Venezuela, cooperacion y sosten di Hulanda pa atende cu e crisis, simposio di SER, Visa pa Venezuela, proyecto di World Bank “Doing business report”, preparacion di asamblea general di Nacionnan Uni, proyectonan di Union Europeo, integridad, digitalisacion den gobierno, y e-Government.

Tambe a haya un presentacion di Sociaal Economische Raad cu a duna un relato di e simposio cu e SER nan di Aruba, Curaçao y Sint Maarten a organiza na mei ultimo riba e tema di migracion.

Nan a presenta recomendacionnan hopi importante pa nos pais cu ta atendiendo cu un crisis migratorio. Despues di e reunion e tres Prome Ministernan a tene un Conferencia di prensa na Curaçao.

Premier Rhuggenaath a elabora extensamente riba tur locual a worde delibera durante e reunion y a gradici coleganan Premier Wever-Croes y Premier Romeo Marlin pa e cooperacion.

Premier Wever-Croes a gradici Premier Rhuggenaath pa a organiza e reunion. El a enfatisa cu apesar cu ta tres pais autonomo, mirando cu Aruba, Curaçao y Sint Maarten no ta paisnan grandi, si nos traha hunto nos ta mas fuerte.

Aruba ta solidario cu Curaçao den e situacion dificil financiero cu Curaçao ta aden. Y den nomber di Gobierno di Aruba a gradici Curaçao y Sint Maarten pa e sosten.

Pa loke ta e situacion na Venezuela, Premier Wever-Croes a indica cu nos ta convivi cu locual ta pasa na Venezuela, pero awor mester pensa riba Aruba prome.

Fuente: Diario de Aruba