Citgo ta uza e situacion di Venezuela na su fabor pa Aruba no claim si nan no cumpli

Den conferencia di prensa di gobierno, Dialuna cu a pasa, Minister Presidente mr. Evelyn Wever-Croes a wordo puntra pa e situacion cu Citgo y con ta cu cumplimento di contrato cu Aruba, y kico lo pasa si ora e deadline yega, nan no a cumpli.
E dignatario a menciona cu aña 2019 ta e aña decisivo pa e Plan di Citgo, pasobra e contrato Ta stipula cu na October 2020 e mester ta completamente cla cu e rehabilitacion.

Citgo a presenta un plan alternativo den cual nan lo a keda cla cu e fase cu ta andando actualmente, cu ta evaluacion y taxacion cu mester keda cla na Maart y pa April cuminza cu e ultimo fase pa termina cune e siguiente aña.

E dignatario a subraya cu si esey no ta e caso, naturalmente e ta bira mas cla cu nan no ta bay logra yega na e fin di e contrato na 2020.

“E hecho cu cosnan ta bayendo dificil na Venezuela, y cada bez peor, y e situacion ta bayendo mal cu Citgo, ta argumentonan cu nan ta uza na nan fabor, pa e ora ey nos no claim cu nan y no kibra e contrato pa incumplimento. E aña aki naturalmente, nos ta den spera di consehonan relevante pa e ora ey nos defini nos plan”, Prome Minister a declara.

E dignatario a indica cu, en todo caso, e lo no ta na Januari aki pasobra nan tin te Maart pa bin cu un plan alternativo pa por ehecuta e proyecto toch te na October 2020.

Fuente: Con información de https://www.diario.aw