viernes, 13 de abril de 2018

(Aruba) Contratista principal: Situacion na refineria CITGO no a cambia

Mientras cu ya caba ta un siman pasa cu ehecutivonan di CITGO Petroleum a sigura tanto oficialnan di Refineria di Aruba (RDA) y representantenan di gobierno cu e slow down anuncia algun siman prome ta pa ‘pasado’, contratistanan pa e refineria ainda no ta kere esaki. Por lo menos segun un di nan, no a tende nada di e cambio aki. “Un siman a pasa y nos no a wordo notifica di nada ainda”, Antonio Azzariti, director di e compania Constructura Azzurra a bisa NoticiaCla. E compania Italiano/Venezolano encarga cu construccion di e ‘mancamp’ pa e refineria ta den disputa cu CITGO pa pagonan atrasa cu no a ricibi ainda. Como paso, nan tin dos ‘beslag’ riba e compania vigente. Y ya nan a sigura e portal aki cu nan ta preparando e siguiente paso, cu ta esun grandi esta un caso legal pa demanda placa atrasa.


GANA TEMPO

Segun Azzariti, loke cu CITGO ta haciendo, ta simplemente purbando di gana tempo, pa nan saca nan curpa di un situacion fastioso. Nan (e contratistanan) no ta kere ningun rato so loke cu CITGO a bisa siman pasa durante nan bishita, esta cu nan ta sigui cu e proyecto y cu e ‘slowdown’ ta cancela. Azzariti simplemente no ta kere cu nan tin e placa necesario y cu e situacion cu nan ta(bata) aden, no a cambia. CITGO debe e compania constructura basta placa, y tin lunas sin cu nan a wak esaki. Como tal e declaracion di siman pasa pa nan no ta cuadra cu realidad. Mas bien e compania CITGO ta tumando hende haci, y ta rek tempo pa wak si nan por saca nan curpa afo. E unico contacto actual cu e contratista tin cu CITGO ta uno legal, esta pa medio di nan abogadonan. Y mirando cu ainda nan tin e beslag riba CITGO, nan a sigura e portal aki cu e siguiente paso ta canando. Esaki ta un caso legal unda cu nan lo demanda CITGO den corte, pa paga nan tur loke e compania Venezolano/Mericano debe nan. Nan no a duna un fecha pa e caso ey si.

BESLAG Tabata na comienzo di luna di maart, cu e compania constructora Azzurra a pone beslag riba e mancamp riba tereno di refineria CITGO. Esaki debi cu segun abogadonan di e compania constructora, CITGO Aruba debe nan un suma cuantioso. Como tal pa medio di nan abogado, nan a eherce nan derecho di pone beslag riba e propiedad. Tabata apenas un dia cu e ehecutivonan di e compania Azzurra den un entrevista exclusivo, a bisa cu CITGO Aruba a informa nan cu nan trabou ta termina, mientras cu nan a anuncia cu nan ta efectua un 'slowdown'. Nan a bisa na tal ocasion cu nan a keda sorprendi pa e accion aki mirando cu tabata falta apenas 3 pa 4 siman pa completa e trabou. E suma cu CITGO Aruba lo ta debe nan, ta cuantioso. E beslag mientrastanto ta tanto riba e cuentanan bancario di e refineria como riba e propiedad. Esey kier men cu tanten cu tin beslag riba e mancamp, ningun hende por subi e tereno ey.

SORPRESA

Esaki ta e mesun contratista principal encarga cu e asina yama ‘mancamp’ pa CITGO Aruba, cu a keda sorprendi cu e anuncio abrupto di CITGO pa un ‘slowdown’ algun siman pasa. Den un entrevista exclusivo cu NoticiaCla e tempo ey, e director di e compania a bisa cu mientras cu CITGO a bisa nan tambe cu ta un slow down, pa nan esaki a nifica un ‘shutdown’. “Nan a invita nos pa un reunion y a participa nos cu nos trabou ta para mesora” Azzarati a splica e portal. Algo cu nan no ta compronde pasobra tabata falta apenas 3 pa 4 siman pa termina e trabou.

Fuente: Con información de https://www.noticiacla.com - (PULSE AQUÍ)

No hay comentarios:

Publicar un comentario

Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.

LEA...

 
LO + LEÍDO...

LO + LEÍDO...