(Aruba) POR tin un serie di pregunta pa Minister Presidente y su team tocante CITGO

Diamars mainta a tuma lugar den Sala di Conferencia di Parlamento, e rueda di prensa di Fraccion di Partido Pueblo Orguyoso y Respeta, e Plataforma Forza Nobo (POR). Tanto sr. Allan Howell como drs. Marisol Lopez-Tromp (lider di fraccion) a hiba palabra y e tema cu ambos parlamentario a trata ta e Refineria CITGO Aruba, y su proceso anuncia recientemente di “slow down”.
Parlamentario Howell a señala cu mirando cu simannan y lunanan ta pasando y Parlamento no ta haya e informacion debi pa haya sa kico ta pasando, exactamente, den CITGO.

E Parlamentario a indica cu e hunto cu su colega sra. Marisol Lopez-Tromp a haci nan tarea, esta investigacionnan pa saca afo kico ta pasando, pero tambe ta importante pa sa for di Gobierno mes kico ta e situacion den CITGO.

Fraccion di POR a tuma nota algun siman atras cu e Gerencia di CITGO a anuncia cu nan ta bay den un proceso di “slow down” riba e trabaonan cu ta tumando lugar.

Howell a subraya cu CITGO tabata den un “slow down caba” y e pregunta cardinal ta “con mas ta bay slow down” y kico nan ta considera “slow down”.

A tuma nota tambe cu bastante hende a bay cas. Trahadornan cu ta cay bao di contratista, cu awor a perde trabao, mientras cu den e temponan aki ta dificil sin duda, asumi un noticia asina despues cu tabata tin paz y trankilidad pa hopi mayor cu nan por pone pan riba mesa.

“Tambe nos ta bon na haltura cu tin cierto fenomeno ta pasando den CITGO unda cu casi por considere un sistema un poco dictatorial, unda Arubianonan no tin mucho cos di bisa, mester warda tur tipo di cos chambon y keda keto tambe”, Parlamentario Allan Howell a declara.

El a agrega cu e siman aki nan ta wardando Prome Minister bin Parlamento, pa duna cuenta, y POR ta spera cu e lo bin cu tur e personanan concerni cu lo por contesta nan preguntanan, pasobra tin hopi pregunta pa cual POR kier haya contesta, contratistanan y tambe pueblo kier haya sa. Nos pueblo merece di sa exactamente loke ta bay pasa cu CITGO, e parlamentario a acentua.

El a subraya cu no ta posible cu nos pueblo ta sigui keda den scuridad y scucha cierto movecion of maniobra cu CITGO ta bin ta haci pa na final di dia bin tende y haya e clap cu e refineria no ta bay habri mas, of mihor bisa “at all” pasobra manera e proceso a bay POR ta considera cu nunca el a wordo habri.

Algun pregunta a bay caba pa Gobierno, sr. Howell a menciona. Pero tin un serie di pregunta mas na caminda, pa ora POR ta topa cu Minister Presidente y su team, den Parlamento.

Preguntanan cu POR a manda di antemano ta, entre otro:

• CITGO ta anuncia “slow down”. Kico ta wordo considera como tal?
• Cuanto contratista local ta paden ainda, y cual ta e expectativanan pa nan. Ya conoci cu ya tin contratistanan cu a bay y cu no mucho mas a keda. Y cu nan tey no pasobra tin gran trabao pa haci, sino pasobra pa nan necesidad den nan “job discussion” cu nan mester ta presente.
• Cual ta e motibonan principal pa slow down y pa ki tempo nan ta premira un aumento den e velocidad bek cu nan tin cu pick up atrobe. Pasobra a papia masha bunita cu lo slow down, pero no a disminui ni a bin saver over pa ki tempo nan tin pensa di pick up atrobe.
• Cuanto persona a perde nan trabao? POR kier sa exactamente cuanto empleado a perde nan trabao y kico gobierno a haci pa reuni cu e personanan aki; si a yuda nan den un proceso pa haya un otro tipo di trabao.
• Si e personanan cu ta traha directamente bao di CITGO cu tambe ta core riesgo di perde nan trabao. Nan ta spanta y preocupa pasobra nan no sa kico ta bay pasa cu nan, dentro di poco. Ta conoci den tempo di Valero, kico e hendenan aki a pasa aden, mas cu di berdad por bisa cu nan a haya un pakete, pero tin hopi famia cu a sufri bao ciere di Valero y esaki ta un trauma cu a keda y sin duda nos Arubianonan, principalmente e trahadornan di CITGO no kier pasa bek den dje.
• Kico gobierno a haci pa esnan cu a perde nan trabao inesperadamente. Esaki ta parti di e preguntanan cu a bay pa gobierno pero sr. Howell a reitera cu tin hopi mas pregunta ainda pa haci gobierno durante su encuentro cu Parlamento.

Parlamento lo reuni cu comision di CITGO

Dia 8 di Maart proximo, parlamento lo reuni cu comision di CITGO, RDA y FMSA, unda nan mester duna informacion y aclaria tambe na pueblo pa cu e situacion, Presidente di Parlamento Juan Ady Thijsen lo amplia e infromacion aki. Presidente di Parlamento, Sr. Ady Thijsen ta amplai ariba esaki.
Ta hopi importante pa e desaroyo di e proceso lo wordo haci den un forma abierto unda cu lo por sinti e preocupacion di e pueblo tambe, pa zorg cu un posible solucion lo por a bin riba e mesa, segun Sr. Thijsen.
No por keda depende di refineria, unda cu relaciona cu esaki Presidente di Parlamento a bisa keto bay un decision lo mester cay pa cuminsa bay den un otro direccion cu lo por garantisa Aruba su desaroyo, aunke cu ainda lo tin un escenario cu un Citgo cu ta bisa cu ainda kier cumpli, pero mester mira e realidad di acuerdo cu parte huridico.
Tin otro alternativanan na porta cu gobierno lo ta den desaroyo cu e estudio di esaki pa cuminsa considera den e sentido aki tambe unda cu compañianan ta para pa drenta ora Citgo lo caba di Sali, pero riba esaki mester tuma den consideracion cierto aspectonan prome cu bolbe habri e mercado di refineria awor aki unda cu gobierno mester wak si lo ta conveni pa pais Aruba e biaha aki si of no.
E Transhipment lo keda Aruba, ya cu esaki ta e parti atractivo. E Transhipment ta ganando placa aworaki y esaki genera ingreso pa Aruba y lo garantisa puestoann di trabao. Sr. Juan ‘Ady’ Thijsen a sigui bisa cu cu parlamento no tin nada contra di Citgo. Si lesa e docuemntonan bon, y bou di circumstancianan y cu lesa y studia ley bon, si wak tur e parti unda Hulanda a hunga un rol grandi den esaki. Por bisa cu e decision tabata bon, siendo cu Citgo no a cumpli cu e contract. Como hurista, Sr. Thijsen ta bisa e ta wak e scur pa CITGO por sigui. Pero e decision ta keda na gobierno ken ta esun cu ta deal cu nan pero cu como parlamento mester ta prepara. Semper mester tene na cuenta trabou nos hendenan den comunidad, pasobra cada famia lo bay wordo afecta den un escenario cu si Citgo cera.
Pa ultimo Aruba lo mester mantene nan fuente di negoshi manera Turismo, e uso di e Tranship y keda inverti riba otro recursonan pa no keda depende di un mercado so, unda cu lo tin planea tambe riba esaki un banco di desaroyo pa empresarionan chikito y grandi, cu lo trece hopi cupo di trabao. E sector di agricultura , cria y pesca cu lo mester bira un otro pilar economico pa Aruba, segun Sr. Juan ‘Ady’ Thijsen, presidente di Parlamento.

Fuente: http://www.diario.aw // https://masnoticia.com