(Aruba) Minister indicando cu e proceso pa e rehabilitacion di e refineria ta canando

Ya e vacaturanan a cuminsa worde publica di parti di Citgo Aruba. Drs. Paul Croes, minister di labor, ta na altura di esaki. El a splica cu manera cu ta bin ta bisando, ya caba for di algun luna, e proceso pa e reapertura, rehabilitacion di e refineria ta canando.

Por a tuma nota di e vacaturemeldingnan cu a cuminsa sali di e diferente trabaonan cu e refineria ta publicando den prensa local, caminda nos localnan por aplica y pa asina haya trabao.

Esaki ta un grato noticia pa nos comunidad. Siman pasa, Croes tabata tin reunion cu e gerente general, Alirio Zambrano, caminda cu el a menciona e diferente funcionnan cu ta bay habri den e siguiente siman.

Pa tal motibo awe, hunto cu Citgo kier a comparti esaki den comunidad, unda cu ta bay brinda oportunidad na nos trahadonan local pa asina na por bin back y traha den e refineria.

Banda di esaki ta informa comunidad cu e gerente a informa e minister, hunto cu minister de Meza y minister Richard Arends, cu dentro di e siguiente simannan aki, esta 2 siman padilanti, lo bay tin proyectonan cu lo bay inicia, unda cu contratistanan local lo ta ehecutando esakinan y unda cu mas di 100 trahado local lo ta worde yama pa asina bin ehecuta e trabaonan aki.

E noticianan aki ta importante pa informa na comunidad di dje, den un forma prematuro, pa asina nan por prepara tambe pa entrega nan solicitudnan.

Banda di esey ta informa comunidad cu cada un di e funcionnan aki cu Citgo ta publicando, Citgo Desk, database di e trahadonan local, ta worde manda tambe cu e diferente personanan cu tin e specialidadnan aki.

Banda di e specialidadnan aki, tur e contratistanan cu ta bay tin mester di trahadonan local, den diferente funcion, e trabaonan aki tambe ta worde manda por medio di Citgo Desk pa e personanan di Citgo, den e caso aki directamente pa nan, pero tambe pa e contratistanan cu ta bay haya e proyectonan aki.

Por adelanta cu e proyectonan aki ta trabaonan civil, trabaonan di inicio pa asina por bay over na reapertura, na rehabilitacion basicamente, na unda cu dos contratista local lo ta hayando e proyectonan aki, caminda cu lo ta mandando diferente trahadonan local pa por yena e vacatura di e trabaonan aki.

Esaki ta importante pa bisa tambe cu ta kita tambe e incertidumbre cu oponentenan politico ta trata di trece den henter e scenario aki, bin cu mentira, trece angustia, trece preocupacio bao di diferente personanan local.

Gobierno di Aruba, manera a menciona na varios ocasion, minister Paul Croes, ta minister di labor di e Arubianonan cu ta biba riba e pais aki y ora cu mira un anuncio asina aki ta yenabo di alegria naturalmente, cu bo yiunan di tera, en todo caso, ta e promenan yama pa por haci e trabaonan di refineria.

Despues di un reunion hopi positivo cu e gerente general di Citgo Aruba, a keda tambe riba cierto acuerdonan cu na momento cu nan ta bay habri cierto proyectonan, na momento cu nan tin trahadonan cu nan mester, nan lo ta den consulta directo cu Gobierno pa asina por propone trahadonan local, pa asina ehecuta e funcionnan aki na Aruba.

Fuente: http://www.diario.aw