(Aruba) Rapsol den e fase cercano na cuminza cu perforacion den nos awanan teritorial

Durante e conferencia di prensa relaciona cu e hecho cu Rapsol ta drenta den su di tres fase di exploracion di gas den nos awanan territorial, sr. Willy Hernandez, representante di Rapsol a hiba palabra.
Na prome lugar el a gradici Prome Minister Mike Eman, Minister di Energia Mike de Meza y sr. Armando Curet pa e comunicacion y colaboracion cu nan a mantene cu Rapsol, cu ta operando e proyecto, durante e dos prome etapanan cu a conclui.

El a haya cu mester resalta esaki pasobra no semper tin e mesun fluidez y cooperacion entre companianan cu ta haci e inversion y ta core riesgo den e fase di exploracion, y e gobierno of companianan nacional cu ta monitorea e proceso. Raspsol tin actividad den 39 pais na mundo di cual den varios sr. Hernandez tabata presente, y e kier a remarca e cooperacion y fluidez di gobierno y compania concerni cu Rapsol.

E proyecto aki a encera un inversion importante y un incertidumbre tambe importante, of manera nan ta yame den e industria ‘’high inversion high risk’’ den e contexto aki y den e situacion actual di e industria petrolero, cu no ta den su mihor momento como consecuencia di e prijs di crudo.

Pues, e tabata un decision importante y balente, cu ta demostra cu Rapsol ta un compania explorador y no speculado, pasobra den exploracion no por specula hopi, mester inverti placa cu riesgo y esaki ta worde haci pa e companianan cu kier crece y aplica nan tecnologia y innovacionnan. ‘’Tur cos a worde bisa, mi ta kere, y e decision ta pa bay den e periodo exploratorio cu ta consisti di cuater fase y den cada un tin compromisonan cu ta worde stipula den e contrato, y cu mester realiza prome cu pasa na e siguiente fase’’ sr. Hernandez a expresa.

El a agrega cu awor a pasa di fase un pa fase dos cual ta mas importante no solamente pa e cantidad di inversion cu tin envolvi, sino tambe pasobra e ta e fase den cual por confirma si tin presencia di hidrocarburo den off shore di e zona norte di Aruba.

Esaki ta bay ta mas tangible specialmente pa e hendenan cu no ta familiariza cu e industria petrolero. E siguien paso ta perfora y esaki ta locual a worco comunida na e Compania Arubiano di Petroleo, sr. Hernandez a subraya.

Fuente: http://www.diario.aw