(Aruba) 10 aña di prison exigi pa Venezolano sospecha di a haci tres asalto arma

Fiscal a baha pisa riba e Venezolano N.V.J., kende ta wordo sospecha di a haci tres asalto arma. E Venezolano aki ta forma parti di un grupo pero e resto di e grupo nan caso a keda posponi pa otro luna.

Fiscal a manda un señal bon cla cu na Aruba no ta tolera cu extranhero ta bin haci asalto arma pa asina haya placa pa bay nan pais cu esaki. El a exigi 10 aña di prison pa N.V.J. mientras cu e complice di un asalto arma, J.d l C., Fiscal a exigi 3 aña di prison.

ASALTO ARMA

Hues a puntra J.d l. C. y N.V.J. si nan ta culpable. N.V.J. a admiti cu na 15 Mei 2016 el a haci asalto arma na Dennis Bar na Hooiberg, dia 17 di April 2016 na un cas den Koningstraat y e mesun dia riba un homber cu tabata cana banda di un lugar.

Hues a mustra cu segun doño di e bar, dia 15 Mei 2016 na Dennis Bar, dos persona a presenta y un a saca un arma for di un tas. El a bisa cu “este es un asalto”. Un di e empleadonan a wordo ordena pa drumi y despues e asaltante a dale cu skop na cabez. El a pidi pa placa y e empleado a bisa cu e doño a bay cu e placanan. Despues e asaltante a Sali for di e bar y a bolbe y los dos tiro. Despues el a pidi e cellularnan y otro pertenencianan di e empleadonan.

Hues a mustra cu tin declaracion di testigonan. Segun N.V.J. a declara na Recherche, ta ariba orden di J.d l C., e mester a haci asalto. Hues a sigui bisa cu tin imagen di videonan di seguridad. Ariba video por mira J.d l C. sali for di e bar y un rato promer cu e asalto a sali cu un auto pero despues ta bolbe. Hues a bisa cu e testigonan a reconoce N.V.J. como e persona cu a haci e asalto arma.

Segun J.d l C., no a planea nada di e asalto. El a desmenti cu el a duna instruccion na N.V.J. El a bisa den Corte cu e mester a drenta promer e bar pa mira e situacion y despues mester laga sa si tur cos ta cla pa e asalto.

Hues a mustra cu tin declaracion di N.V.J. cu ta bisa cu ta J.d l C. lo tabatin dos arma y lo a hib’e for di e lugar. J.d l C. a bisa cu e tabata den Dennis Bar ora cu e asalto arma a sosode y no a hiba N.V.J. Hues a puntr’e con N.V.J. a yega eynan. El a bisa cu e no sa. Segun J.d l C. riba e video por mira tur cos.

SOSPECHOSO BAO MENAZA

N.V.J. na dado momento a bisa Hues cu e kier aclarea cu J.d l C. no tin nada di haci cu e asalto arma den e bar. El a bisa cu a huur e dos armanan for di un muher. Hues a puntr’e si e tabatin dos arma. El a bisa cu e tabatin un arma so. El a bisa cu un homber W. ta esun cu a planea tur cos.

Hues a puntra N.V.J. pakico el a declara contra J.d l C. El a bisa cu nan a menace pa declara asina. El a bisa cu W. ta esun cu a hib’e na e bar. El a bisa cu W. tin un organizacion na Venezuela y e mester a haci loke nan bis’e sino su famia ta den peliger. El a admiti di a gaña contra J.d l C. pa asina tapa W. El a bisa cu W. tambe tabatin un arma cun’e.

ASALTO CAS

Hues a mustra cu den Koningstraat riba 17 April 2016, tres asaltante arma a drenta un cas caminda muhernan di bida ta keda y a bay cu joyas. Tambe riba e mesun 17 April 2016 den Koningstraat asalta un persona cu ta cana.

Den Koningstraat, e cas a wordo asalta door di N.V.J. y otro. Hues a mustra cu segun e relato di Recherche, e muhernan di bida cu tabata keda den e cas a bisa cu e asaltantenan a drenta den e cas y ordena nan pa drumi abou. Nan a coy nan pertenecianan. Tin un di e victimanan a bisa cu un asaltante a dal’e cu cabo di e arma na su cabez y kap su cabez. Un di e testigonan a reconoce N.V.J. como un di e asaltantenan.

N.V.J. a desmenti di a haci e asalto arma. El a bisa Hues cu e conoce esnan den e cas y nan tambe conoce. Hues a puntra N.V.J. si e sa kendenan a haci e asalto arma. El a bisa cu si pero e no tabata envolvi. El a bisa cu e no tabata eynan ora asalto a sosode.

El a bisa cu e asaltantenan a bay Venezuela. Nan a bay pa e prostitutanan. Segun N.V.J. el a bay pa tin relacion cu un di e muhernan. Dos a drenta y saca arma y bisa cu ta un asalto arma. Segun N.V.J. e ta kere cu el a wordo usa pa e dosnan haci e asalto arma. Despues nan a core bay den auto. N.V.J. a bay na su apartamento na Socotoro. Despues e dosnan a bay na su apartamento y a reparti cosnan. Despues un di e asaltantenan a bise cuidao e papia sino lo mate. N.V.J. a haya 200 florin.

Fiscal a remarca cu tur e hendenan ta papia di tres asaltante. N.V.J. a bisa cu e no tabatin arma y no a haci nada.

Tambe N.V.J. a atraca un homber cu tabata canando den Koningstraat.

EXIGENCIA

Fiscal a condena total e hecho cu hendenan ta bin di exterior, den e caso aki Venezuela, pa horta na Aruba. Esaki door di e situacion cu nan ta pasando aden na Venezuela. Sinembargo esaki no ta hustifica cu nan ta bin Aruba y bay haci asalto arma. Esaki ta un delito hopi serio y ta causa hopi inseguridad den comunidad mientras cu e victimanan ta keda cu trauma. Fiscal ta haya cu a keda legalmente proba cu N.V.J. ta culpable di tur tres asalto arma, mientras cu J.d l C. ta complice den e asalto arma na Dennis Bar.

Fiscal ta haya cu mester manda un señal bon cla pa tur esnan di exterior cu tin pensa pa bin haci asalto arma of atraco na Aruba, cu no ta tolera esaki. El a exigi 10 aña di prison pa N.V.J. y 3 aña di prison pa J.d l C.

Hues a sera tratamento di e caso y a bisa cu e lo bay studia e caso y pa 2 December lo tin sentencia.

Fuente: http://www.diario.aw