(Aruba) Encuentro y combersacionnan tumando luga pa defini futuro politico di Otmar Oduber

Awe un siman despues di a presenta pa renuncia di e Gabinete actual, sr. Otmar Oduber ta expresa di ta sumamente satisfecho cu e reaccion di comunidad te cu aworaki. “Hopi ta e personanan cu ta tuma contacto cu mi y ta mustra riba e hecho cu nan kier un forsa nobo aki na Aruba. Den e transcurso di e dianan cu ta bin, ta spera cu por tin un decision riba e rumbo cu mi persona ta scoge pa politica aki na Aruba.”

Un siman despues di entrega retiro:

‘Mi ta hibando un trayecto di combersacion cu hopi hende den comunidad e ultimo dianan aki y tambe a reuni cu diferente grupo. Manera mi a bisa na cas di mi mayornan: Mi no ta mira cu carera politico di Otmar Oduber ta finalisa di e forma aki. Mi a bisa tambe cu mi lo duna e sosten necesario na e mas di 4000 votonan cu a brinda nan confianza na mi persona pa por sigui defende nan interes na tur momento’. E decision di futuro di sr. Otmar Oduber ta algo cu ta bay den consulta naturalmente cu henter su famia y tur e cantidad di hendenan cu tur dia ta whatsapp, email y yama su persona.

Posibilidad activo como politico:

Mientrastanto hopi a worde bisa den rednan social entre otro pa loke ta ‘un partido cla pa lanta’. Sr. Oduber ta bisa cu tin algun punto cu e ta tene cuenta cu ne prome cu dicidi si ta continua activo den politica. En todo caso, un plataforma existente no tin posibilidad p’e y cu e unico forma cu Otmar lo keda den politica activo como un politico, ta si e ta riba un plataforma propio y cu tin un pensamento y un vision nobo y diferente pa loke ta comunidad di Aruba.

E sosten di comunidad ta un di e puntonan hopi importante prome cu tuma cualkier decision. Pero tambe sr. Oduber ta bisa: ‘Ta importante cu si ta crea un plataforma nobo, pa mira cu e plataforma nobo aki ta a base di un fundeshi cu ta trece un rosea nobo den politica na Aruba. Uno cu ta trece un diferencia den con ta trata politica na Aruba’.

Awendia hobennan tin acceso na informacion global teniendo na cuenta tur e plataformanan cu por haya informacion y e hecho cu hopi tin e oportunidad pa studia den exterior. Esaki ta cambia tambe locual cu ta influencia e generacion nobo di votadonan, contrario na antes unda cu ta haya generacion tras di generacion cu ta keda un color politico pa motibo tradicion y influencia di adulto (esunnan mayor cu nan).

Finalisando sr. Oduber a enfatisa: “Nos ta activo y mester bisa cu pueblo di Aruba ta anhela un cambio, un cambio den mentalidad, un cambio den un gobernacion cu di berdad ta worde sinti a base di e principionan di cual un famia ta basa su mes riba dje. No cu cosnan ta bunita di pafo so, pero cu di berdad economia ta positivo y cu nan por biba cu esaki. Cual naturalmente ta crea oportunidad pa futuro di e pueblo di Aruba”.

Fuente: http://www.diario.aw