(Aruba) Firmamento di MoU cu CITGO a duna San Nicolas un speransa nobo

Diamars atardi Ministernan de Meza y Croes a firma un Memorandum of Understanding (MoU) cu e compania petrolero CITGO, cu ta habri caminda pa cuminsa haci e investigacionnan necesario pa posibel reapertura di Aruba su refineria.
E ta conoci cu pa algun luna caba sr. Glenbert Croes tabata biahando pa Venezuela p’asina busca e posibilidad di habri Aruba su refineria bek. El’a logra reuni cu tanto ehecutivonan halto di PDVSA (propietario di CITGO), como tambe miembronan di Gobierno Venezolano y asina habri porta pa negociacion por a tuma lugar.

Awe nos por mira cu satisfaccion con e esfuerso haci pa Glenbert Croes y partido MEP a duna resultado. Nos a pasa for di ningun posibilidad pa re-apertura di refineria, pa firmamento di un MoU cual ta e caminda pa Aruba su refineria habri bek.

Ainda ta fresco den nos memoria, con na luna di april di e aña aki, Minister de Meza a anuncia cu lo desmantela Aruba su refineria dunando asina tur prioridad na e proyecto di Hotel Bahia Principe. Contrario na e declaracion actual di Minister de Meza sigurando di tabata den negociacion for di aña pasa pa e re-apertura di Aruba su refineria, ainda nos por corda con e mesun Minister aki tabata declara publicamente cu no tabatin interesado pa habri e refineria di Aruba bek.

Desde cu partido MEP a cuminsa cana e caminda pa busca interesadonan pa opera Aruba su refineria, a resulta cu toch si tabatin compania interesa. Un otro prueba di e maneho inconsistente y irealistico cu Gobierno di Gabinete Mike Eman semper a hiba.

Awor no ta keda nada otro cu gradici colega Glenbert Croes pa su esfuersonan haci pa por a realisa un posibel re-apertura di Aruba su refineria.

Di awor pa dilanti ta keda den man di Ministernan Mike de Meza y Paul Croes pa haci nan trabou como parti di Gobierno di Aruba, y percura pa e negociacion cu CITGO cana positivamente.

Fuente: http://www.diario.aw