Si CITGO a cera un MoU cu Aruba ta pasobra nan ta hopi serio den nan intencionnan pa cu e refineria

Minister Mike de Meza a resumi algun di e detayenan cu nan lo ta studiando y informacion cu nan lo ta pidiendo, asina dunando un miho idea di e cantidad di tempo, esfuerso y experticio cu ta bay den un “due diligence”, cu ta refleha na un forma hopi cla tambe e seriedad di e intencionnan di CITGO pa cu Aruba.

Due Diligence ta cubri detayenan manera e historia di diferente parti y ekipo di e refineria. Esaki ta encera datonan di corosion den tur area y di tur ekipo, e estado actual di ekiponan, historia di mantecion di e ekiponan y integridad di e materialnan, entre otro.

Un lista completo di inventario ta worde hinca den un programa di software, unda cu ta agrega tur informacion necesario, incluyendo nan capacidad, integridad y con bieu nan ta, pero tambe ki tempo a cambia cierto tubonan, ki tempo a haci mantencion riba un parti di un ekipo specifico y ki estado nan ta aden actualmente.

Lo inclui informacion manera ki ekiponan falta y kico ta costa pa reemplasa nan.

E sondeo di e parti economico y e parti financiero ta crusa otro y ta worde registra pa asina por saca tur calculacion necesario.

Minister de Meza a amplia riba e topico bisando cu tur scenario lo worde studia, manera ki tipo di crudo lo worde uza, e temperaturanan cu lo bay uza, e tipo di productonan cu lo bay traha; esakinan ta detayenan relevante pa cu e inversion y e potencial di ingreso y ganashi di e refineria.

Ta modelonan di software hopi intensivo cu CITGO mester “run”, Minister de Meza a subraya, añadiendo cu ta inclui prijsnan di crudo mundial, gastonan di operacion, salarionan, cuanto empleadonan mester recluta, y cuanto ta costa pa provee e siguridad desea pa e empleadonan, pero tambe pa e planta en general, e comunidad y medio ambiente. Te hasta e condicionnan di e fundeshinan di ekiponan ta worde evalua.

Pa loke ta medio ambiente, entre otro lo ta planeando con lo maneha emisionnan di acuerdo cu standarnan internacional. “Standard operating procedures”, incluyendo “contingency plans y plannan di siguridad”, tambe ta central den henter e evaluacion.

CITGO lo ta buscando seriamente pa e “most optimum economic scenario”. Nan ta busca pa tur cos “fit”, incluyendo e margen di ganashi pa yega na un acuerdo final.

Por conclui pues, cu pa un compania asina grandi dicidi pa cera un MoU cu Aruba y inverti un suma considerabel den haci un evaluacion di e refineria, ta pasobra nan ta hopi serio den nan intencionnan pa cu e refineria na Sero Colorado.

Fuente: http://www.diario.aw