(Aruba) Contract cu CITGO lo ta di 20 aña minimo

Cu e sondeo preliminario y varios reunion tras di lomba, a tuma luga e firmamento di e Memorandum of Understanding (MoU) entre Gobierno di Aruba y e compania Mericano CITGO algun dia pasa na Houston, Texas.

E siman aki a cuminsa un periodo cortico pero hopi intensivo di “due diligence” di parti di CITGO y gobierno pa asina establece si CITGO lo cumpra e refineria for di Valero y bira e partner nobo di Pais Aruba den e proceso pa rehabilita e pilar economico aki.

Ya pa fin di aña 2015 lo tin un contesta for di CITGO, y Minister Mike de Meza ta hopi optimista y entusiasma pa cu un resultado positivo for di e due diligence y negociacionnan cu Valero y gobierno. Aunke cauteloso den su declaracionnan ainda despues di varios reunion cu CITGO, e mandatario a bisa cu e desaroyonan rond di e tema aki ta mustrando hopi bon.

Un “SI” for di e tres institucionnan envolvi, esta CITGO, Valero y Gobierno, mester resulta den un reapertura di e refineria na Sero Colorado pa un periodo largo. Minister de Meza, kende ta encarga cu e carteranan di asuntonan economico y energia, a bisa cu actualmente e partidonan ta papiando di un contract cu CITGO pa un periodo di entre 20 pa 25 aña.

E reactivacion di e pilar economico “refineria” pa Aruba ta sumamente importante, como cu historia ta mustra cu e refineria tabata percura pa cerca di 20% di e isla su GDP. Den e prome aña, preparando pa un reapertura di e refineria, Minister Mike de Meza a bisa, cu ta calcula cu lo sinti un diferencia significante den e GDP di Pais Aruba caba sin cu e planta ta habri ainda, esta di 7%.

E balor y impacto di e presencia di e refineria, su trahadonan y actividadnan relaciona na contratistanan activo den e refineria, ta sumamente grandi, particularmente pa negoshinan micro, chikito y mediano na San Nicolas.

Recientemente den un entrevista cu prensa e director di e compania Douhsar N.V. a splica cu su compania so tabata cumpra mercancia pa trabao y cuminda pa empleadonan na San Nicolas na balor minimo di 10 mil Florin pa siman. Despues cu e refineria a cera el a wak hopi di e negoshinan cu nan tabata cumpra for di dje cera.

Bankeronan tambe a remarca cu e ceramento di refineria a resulta den un bahada di actividad na nan sucursalnan na San Nicolas. Y esaki no a worde causa particularmente pa movecion di hende, pero e hendenan a bay traha na otro areanan di e isla, y banconan tin e experiencia cu mayoria hende ta haci nan “banking” cerca di unda nan ta traha.

Cu un reapertura di e refineria bao maneho di CITGO indudablemente economia di San Nicolas lo conoce su dianan di gloria atrobe.

Dado caso cu CITGO adkiri e refineria, e lo tuma tur elemento di e actividadnan aki over: transshipment, e actividadnan di refinamento y e mercadeo local (benta di productonan pa publico y negoshinan, esta gasolin, diesel, kerosin y jetfuel).

Entre trahadonan di e refineria directo y trahadonan cu tabata activo den e refineria pa medio di contratistanan prome cu Valero a para e refinamento di crudo, tabatin mas of menos 2700 persona na trabao. Cu reactivacion di e companianan di contratista y atraccion di companianan nobo, San Nicolas lo bira un biaha mas e ciudad vibrante di actividad economico/comercial cu e tabata te cu algun aña pasa.

Combina cu e presencia di mas cliente potencial ora cu e refineria habri, e pakete di incentivonan fiscal cu Minister Mike de Meza a boga p’e y a logra introduci bao di Gabinete Mike Eman I, e ta bira ainda mas atractivo y interesante pa negoshinan sea habri back, habri un sucursal of establece nan mes pa prome biaha na San Nicolas.

E incentivonan fiscal ta valido pa un area basta grandi di P’ariba di Brug, cuminsando for di banda di Marinierskazerne na Savaneta, te cu Punta Basora.

Fuente: http://www.diario.aw