Vision di Gobierno di Aruba ta fit cu e forma di traha di CITGO

Sigur ta un compania renombra y ta worde cataloga como un di e grandinan estableci na Merca, cu por lo menos 40 aña di experiencia. Di nan parti nan ta comparti e vision cu Gobierno tin den nan manera pa traha na un manera pa proteha medio ambiente.

Den un nutshell, Minister di Asuntonan Economico y Energia, Mike de Meza, a splica pa yega asina leu pa sinta cu CITGO, mester a haya sa con fuerte e compania mes ta, ki tipo di compania e ta, kico ta su operacionnan internacional. Kico ta su standard of operation.

Con safe nan ta opera. Por tin un compania grandi, pero un record sumamente halto di incidente, accidente, etc. Tur esey tin cu wak. Tin cu wak tambe financieramente con fuerte nan ta para, con nan ta para riba mercado internacional y si nan tin acceso pa crudo, ki tipo di crudo. Kico ta nan relacionnan cu otro companianan na otro paisnan rond mundo. Con garantisa por ta cu nan por cumpli cu locual mundo kier haci, pero bo tambe kier pa nan cumpli cune. Esey ta un due diligence di tur dos banda. E parti tambe cu mester tuma lugar for di Aruba.

Gobierno mester ta contento cu e compania prome cu yega asina leu. Prome cu firma un MoU, ya caba di tur dos banda, ta haci un preliminary due diligence, un due diligence cu ta menos intensivo, pero ta red flag si ta algo cu no ta cuadra cu locual cu loke tin.

Pa e compania aki a haci’e den un comision basta amplio. Comision di expertonan local riba e tereno aki y expertonan internacional. Pero na fin di cuenta, a yega na e conclusion cu CITGO ta un compania renombra, hopi grandi, hopi stabiel, existiendo pa basta aña caba y ta un compania fuerte. Gobierno sa con su relacionnan ta y no a redflag. CITGO ta un compania cu no tin actividadnan straño internacional. E ta un di e grandinan na Merca, de Meza a splica.

CITGO ta hopi habri y ta bisa cu e pensamento di gobierno ta fit den nan manera pa traha. CITGO ta e compania number 1 na Merca mas complex. Ora papia di complex, ta procesonan hopi delicado, procesonan hopi complica, caminda, cu tin conversionnan cu azetanan mas pisa. Pa azetanan mas light, ta resulta mas caro. Procesonan caminda cu siguridad mester ta hopi intensivo. Aparentemente nan ta mantene nan mes hopi bon na presupuesto cu nan ta pone pa por tin un operación mas efectivo cu ta posibel, eficiente y financieramente tambe mas atractivo.

E ta un compania cu tin margennan financiero relativamente halto cu ta perform pa loke ta e parti di reliability, e parti di safety y security. Nan accident rates ta hopi abao, etc. E ta un compania hopi stabiel den esey. Tambe den combersacionnan preliminario cu gobierno, despues di haci tur e parti aki y tur cos sali positivo pa e proximo paso, nan tambe ta interesa den un relacion di termino largo. Nan ta papia cu nan ta premira algo mas di 20 aña. Nan tambe ta wak den e direccion ey, Minister de Meza a conclui bisando.

Fuente: http://www.diario.aw