Diario de Aruba: Acuerdo Citgo y e pregunta kico ta un crimen contra un pais

Na e prome momento cu un persona wordo confronta cu un crisis, e no ta sinti e peso total. Generalmente na cuminsamento e tin e resistencia of recurso pa pasa den e problemanan. E mester ahusta, bolbe ahusta y den e proceso e ta bay realisa e seriedad real di loke a pasa.

Aruba for di prome cu eleccion di 2017, a nota cu algo tabata completamente robes. Si esaki no tabata e caso, pueblo di Aruba lo no a pone un fin na e mandato cu den confiansa el a entrega na gobierno di Mike Eman pa dirigi e pais.

Aruba originalmente a biba cu e speransa cu e lo sali for di e problema mientras berdad di e situacion a sigui presenta su mes.

Na 2018 e momento cu Mike Eman y su gobierno a priminti Aruba, mester a anuncia su mes. Un economia di oro cu a crece na forma barbaro.

Na momento cu e gobierno di Mike Eman a haci e promesa, el a scapa su mes di e desastre financiero cu el a crea y a gara na Nicolas Maduro pa trece un proyecto cu e mester tabata sa cu lo fracasa.

Awe Aruba ta conoce e realidad di loke Mike Eman a laga atras y nos mester haci nos mes e pregunta, kico ta un crimen contra un pais y kico un pais mester haci enfrente personanan cu conscientemente a hiba e pais na un desaster.

Ora lesa rapport oficial tras di rapport oficial, por mira con instancianan clave a bay contra loke Mike Eman y su grupo tabata haci.

Ora lesa conseho di instancianan oficial cu mester guia e pais na forma independiente, ta topa cu rechaso di baha BBO.

Ora lesa conseho di instancianan oficial ta topa cu advertencia y rechaso pa e maneho economico y financiero cu tabata wordo hiba.

Ora lesa conseho y observacionnan di tur instancia oficial ta mira con Mike Eman a haya guia contra e acuerdo di Citgo, cu tabata contra interes di Aruba.

Awe Aruba ta biba cu resultado di un gobierno cu no tabata tin piedad cu pueblo di Aruba. Un gobierno cu a bay contra bienestar di e pueblo y a destrui hasta futuro cu e generacion actual a habri pa muchanan.

Con bo ta yama un persona cu ta drenta cas di un persona y bay cu su propiedad? Con bo ta yama un persona cu ta asalta un inocente cu ta cay den un trampa?

Con mester yama un dokter cu ta practica mentira pa entrega un pashent un remedi robes?

Con bo ta yama un abogado cu ta laga su cliente na caya?

Con bo ta yama un gobierno, un mayoria den Parlamento, cu ta kibra ley, ignora reglanan cu instancianan oficial ta trece dilanti y ta destrui bienestar di un pueblo?

Ki nomber y titulo mester duna gobierno Eman pa loke el a haci conscientemente cu pueblo di Aruba?

Democracia, cu ta exigi pa bienestar di un pueblo wordo sirbi dor di politico, a wordo mata dor di gobierno Eman cu a trapa riba tur regla pa garantisa bienestar di Aruba.

Awe e mes gobernantenan ey por sigui despista un pueblo digno manera Aruba y riba baricada di caya instiga pueblo?

Awe e gobernantenan cu a destrui Aruba por bin crea mas tension pa e pueblo?

Ki nomber mester duna gobierno Mike Eman?

Nos a habri diccionario. Nos a busca e palabra crimen, delito, accion contra bienestar di otro.

Nos ta hisa nos cara pa mira un homber ta cana ta brasa y nos ta cera e diccionario despues di a tuma nota di e splicacion.

Fuente: Análisis de Diario de Aruba