Diario de Aruba: Husticia Mericano a dagvaard Citgo

Tabata na 2015, ora na Aruba gobierno Mike Eman tabata anuncia yegada di Citgo na e pais, cu husticia Mericano a dagvaard e prome persona pa corupcion den Citgo. Awe, un siman despues cu rond mundo nomber di Aruba a sali publica pa proyecto Citgo, autoridad Mericano ya a dagvaard 20 persona y awor Citgo mes pa actonan di corupcion.

E prome caso cu a wordo investiga den e totalidad di e cadena PDVSA/Citgo y Venezuela tabata pa Un Biyon Dollar na 2015. Merca a dagvaard dos comerciante den caso di droga pa corupcion cu PDVSA den cual e suma di Un Biyon a wordo menciona.

Pa basta dia DIARIO tabata en espera di culminacion di investigacionnan na Merca riba actonan criminal di PDVSA, pa cual rond mundo tin investigacion contra exponentenan di regimen Maduro.

Ta trata aki di actonan di corupcion y labamento di placa di Venezuela. Informacionnan cu Asamblea Nacional di Venezuela mes a emiti na 2014, tabata mustra riba e labamento di placa cu tabata tuma luga pa medio di Citgo.

Ta cu e gerencia di Citgo den tempo di e casonan cu awor Husticia Mericano investiga, Aruba a firma un acuerdo pa e proyecto rehabilitacion refineria na Aruba, cu a fracasa y a destrui economia di Aruba.

Siman pasa DIARIO a informa cu atrobe un comerciante a admiti na Husticia Mericano cu tabata tin corupcion den negoshi cu PDVSA. E tabata uno di e 20 personanan cu Husticia di Merca a dagvaard den casonan di corupcion y a admiti su culpabilidad.

Ayera a drenta e informacion mas importante pa Aruba, cu Merca a dagvaard e compania Citgo mes.

Tabata Bloomberg cu a lansa e primicia ayera cu autoridad Mericano a bay directamente pa Citgo dia 14 di Mei ultimo ora e negociante menciona ariba tabata prepara pa presenta dilanti di Husticia Mericano.

Prome cu e caso aki, ya 16 persona a admiti caso di corupcion den investigacionnan relaciona cu PDVSA, cu a wordo admiti pa Nicolas Maduro tambe.

E gerencia nobo di Citgo, instala dor di Presidente Interino Juan Guaidó, a admiti cu e mester aparece dilanti autoridad Mericano y cu e lo duna su colaboracion na e investigacionnan. Na mes momento Citgo a confirma na Merca, loke el a bisa Ministro Presidente di Aruba, cu e gerencia nobo di Citgo a start un investigacion pa practicanan ilegal den Citgo.

Di e forma aki informacionnan di Ministro Presidente Evelyn Wever-Croes ta wordo confirma cu Citgo a bisa su persona cu tabata tin placa cu lo a wordo paga pa e proyecto Aruba pero cu e placa aki no a yega su destinacion.

Nicolas Maduro, cu ta admiti corupcion den Citgo, a manda e gerencia cu a firma cu gobierno Mike Eman prizon, caminda e persona di contacto mas importante cu tabata e presidente di Citgo e tempo, a muri.

Mientrastanto Mike Eman mes no ta den Parlamento di Aruba pa splica pueblo di Aruba kico a pasa den e proyecto cu el a firma na nomber di Aruba sin aprobacion adelanta di Parlamento y cu blackmail politico contra tur oponente politico cu su partido a acusa (hasta te e momento cu Citgo a fracasa) di no kier sostene e proyecto.

Fuente: Con información de Diario de Aruba