(Aruba) Diario: Maduro no tin poder unilateral riba CITGO

E resultado mas importante di e instalacion di Nicolas Maduro como Presidente di Venezuela, ta e decision di Congreso di Venezuela cu no ta sostene decisionnan di Maduro. E sistema democratico di Trias Politica ta exigi cu Presidente di Venezuela mester di aprobacion di e Congreso pa por tuma decisionnan. Dos decision cu Maduro a tuma hasta prome cu su periodo como presidente eligi di e pais te dia 10 di januari, a ser rechasa pa Parlamento. Esaki ta nifica directamente cu for di awe Nicolas Maduro, cu mundo liber no ta acepta como presidente di e pais, no por dicidi riba CITGO sin pidi permiso di Congreso cu por actua.

Un di e resultadonan directo di e desaroyonan na Venezuela y e instalacion di Nicolas Maduro como presidente di e pais, lo afecta Aruba tambe y crea mas confusion y instabilidad entorno CITGO.

Segun reglanan democratico, Congreso Venezolano a ser eligi dor di Pueblo durante eleccion. Siman pasa e congreso cu Nicolas Maduro no a acepta, a presta huramento y a duna inicio na su labor.

E siman aki nan a rechasa acuerdonan cu PDVSA a firma cu companianan Mericano y Frances pasobra nan no a haya nan aprobacion como legisladonan di Venezuela prome cu a yega na e acuerdonan.

A trece dilanti cu e acuerdonan cu PDVSA a firma a viola articulo 150 di Constitucion Venezolano, cu ta exigi pa contractonan cu estado Venezolano firma cu exterior ser aproba pa Asamblea Nacional. Di tal forma e acuerdonan no ta legal segun Congreso di Venezuela.

Den e contracto Maduro lo a haci concesionnan cu ta bay contra ley, segun legislado Jorge Millan.

Congreso a perde su poder for di 2016 ora oposicion a haya mayoria, pero den e situacion nobo ta spera cu sigur riba tereno internacional lo tin cambio.

Den e acuerdonan cu a firma e dos companianan lo a hinca casi un Biyon pa haya participacion den empresanan comun cu Venezuela.

E acto di Congreso a haya mayor luz den e situacion mundial nobo. For di 10 di januari 2019 mundo no ta reconoce Maduro mas como presidente cu pueblo di Venezuela a eligi na forma democratico. Esaki tin resultado riba tereno internacional legal.

Maduro por nenga di reconoce Congreso, manera a pasa ora el a huramenta como presidente y e realidad nobo di Venezuela a bin dilanti. Mundo liber no a haci acto di presencia como muestra di rechaso.

Fuente: https://www.diario.aw