Gobierno a duna Parlamento tur documento riba CITGO deal

Parlamento di Aruba a haya tur documentacion referente e CITGO Aruba deal diahuebs. Esaki a sosode na comienso di e reunion cu Parlamento a pidi awe riba e situacion di CITGO. A invita prome minister Evelyn Wever Croes pa duna splicacion riba e situacion, incluyendo e “slow down”. Momento cu e reunion a cuminsa, Wever Croes a entrega e contractnan di Citgo na Presidente di Parlamento cu e peticion pa percura cu tur Parlamentario ricibi nan. Ademas cada Parlamentario a a haya e quick scan den cual Hulanda a duna e lus berde na Gobierno anterior pa sigui negocia, pero mes momento a avisa Gobierno di AVP di tur e riesgonan envolvi. Asina mes Gobierno anterior a dicidi di firma e contract. Segun Wever, cu esaki el a cumpli cu locual el a bisa esta ‘cu transparencia ta un prioridad pa e Gobierno aki’.

PREGUNTA

Mayoria di e preguntanan a bin di parti di fraccion di AVP, y un of dos pregunta di parti di fraccion di MEP. Fraccion di AVP tabata kier hopi informacion detaya, mas relevante na e situacion despues cu nan a lague, manera p.e. ken ta den e team di consehero, cua ta e bufete di abogado cu ta acesorando gobierno riba e tema. Fraccion di MEP tabata kier sa e envolvimento di Hulanda den e deal aki, y riba e tema aki a haci algun pregunta mas, referente primordialmente na e quickscan. Segun lider di fraccion Rocco TJon, a informa cu e fraccion a opta mas bien pa tuma tempo pa discuti e documentonan cu atencion, pa despues yama un reunion publico unda cu nan lo atende cu e preguntanan cu nan haya a base di e documentonan ricibi.

WEVER CROES

Wever Croes na su turno a opta pa contesta algun pregunta manera kico ta e plan B di gobierno riba e desaroyo di CITGO. Aki Wever a mustra cu dificilmente por papia di un plan B, tanten cu e conseho huridico riba e contracto no a drenta ainda. Tanten cu esey no ta aden, ta bira dificil papia riba algo concreto. Loke si e por a bisa ta cu si dado caso resulta cu CITGO Aruba realmente a ‘viola’ e contracto, ta nifica e ora cu lo bay inicia un discusion nacional di kico lo mester bira e futuro di e refineria of e area ey sin refineria. “Nos mester dicidi kico ta loke Aruba kier” Wever a finaliza bisando. Mientrastanto a pidi pa dune te cu comienzo di otro siman pa e por repasa e como 80 pregunta cu e la conta cu el a haya pa contesta. E ora lo haci esaki durante un reunion publico riba e tema proximamente.

Parlamentario Alan Howell despues di reunion riba Citgo

Diahuebs atardi Prome Minister Evelyn Wever-Croes tabata den Parlamento despues cu miembronan di e organo mas halto di nos pais a pidie pa duna informacion y claridad riba e situacion di Citgo.

Parlamentario di POR, Alan Howell, manera ta conoci caba ta siguiendo e caso aki hopi di cerca y a manda un serie di pregunta por escrito pa Premier Wever-Croes.

Durante e reunion mes, e tabatin varios otro pregunta relaciona cu e tema y mayoria di nan debi na e complehidad di e situacion no tabatin contesta ainda riba nan y Minister President a informa cu lo bay studia esakinan y ora e bolbe Parlamento den proximo dianan lo contesta esakinan.

E preguntanan cu Howell a haci den Parlamento ta:

1. Cuanto tempo lo duna Citgo di parti di gobierno pa come across?
2. Gobierno ta na altura cu refineria no lo habri mas?
3. Tin un deadline den e contract pa e refineria ta up and running. Si tin esaki cual ta e boet si no por cumpli cu e fecha stipula?
4. Si e refineria no habri mas, cual ta e plannan concreto di gobierno?
5. Nan ta papia cu ta sancionnan tin nan mannan mara. Pa ki tempo nan ta kere cu nan lo sali di e problema aki? Tin un suma cu mester tey pa por si acaso algo bay robes (contract breuk). Gobierno ta na altura si e suma aki tey?
6. Si e refineria no habri mas cuanto mama y tata di famia ta calcula cu lo perde trabou cu ta trahando directamente cu Citgo y cu contratista?
7. Cuanto persona ta trahando directamente cu Citgo awor?
8. Kico gobierno tin pensa di haci cu e parti di transshipment?
9. Cuanto placa Citgo a trece den caha di gobierno te cu awe y cuanto nan ta debe?
10. Cual ta e futuro di RdA y MFSA mirando e situacion di Citgo?
11. Tin un noticia cu a caba di sali cu President di Venezuela a pone medidanan mas fuerte pa cu transporte y comercio entre Venezuela y Aruba, Bonaire y Corsow. Ki efecto esaki lo por tin pa Citgo?
12. Tin contratistanan cu no a cobra durante lunanan, algun di nan pa 7 luna caba. Gobierno ta na altura di esaki?

Durante e reunion Premier Wever-Croes a parti un quick scan cu a wordo haci na 2015 door di Hulanda pa duna conseho na Aruba. Sr. Howell a puntra Prome Minister tambe ken e persona cu a haci e quick scan ta, ken a duna e ordo pa haci e quick scan aki y cuanto peso e tabatin den e negociacion di e gobierno anterior y PDVSA pa loke ta trata e proyecto.

Respuesta di Premier ta cu e no sa ken e persona ta y cu e lo bay averigua mas riba e preguntanan haci. E preguntanan aki pa parlamentario di POR ta hopi importante pa haya respuesta riba nan, pasobra riba e quick scan ta haya e emblema di Aruba y toch ta Hulanda ta esun cu a hacie, e no tabatin firma ni nada, dus e duda ta keda di e importancia di dje den e negociacionnan.

Parlamentario di POR ta compronde cu debi na e mal negociacionnan di gobierno anterior, actual  gobierno y Prome Minister a wordo poni den un situacion fastioso, pero pueblo kier sa kico ta bay pasa cu Citgo.

Alan Howell lo keda monitorea henter e desaroyo di Citgo hopi di cerca y lo keda pendiente di e respuestanan di Prome Minister Evelyn Wever-Croes ora Parlamento bolbe reuni cune riba e tema en cuestion, cual lo mester tuma lugar den e proximo dianan.

Fuente: http://www.noticiacla.com // https://arubanative.com