viernes, 23 de febrero de 2018

Diversas reacciones en Aruba tras paralización de refinería rehabilitada por CITGO


Wever: Autoridad Mericano a bisa ‘We told you so’ riba CITGO deal
Autoridad Mericano a bisa gobierno di Aruba ‘We told you so!”, riba e deal cu gobierno anterior a cera cu CITGO na 2016, pa reapertura di e refineria. Segun prome minister Evelyn Wever na NoticiaCla awe mainta, (e no a menciona cu ken e la papia si), el a sigura e portal aki cu ta na telefon e la ricibi e informacion di ‘nos a bisabo’ (pa no cera un deal cu e hendenan aki refiriendo e deal di reapertura).
Mes momento ehecutivonan di CITGO di Merca a bisa e portal aki mas tempran cu lo ta bon pa gobierno di Aruba intermedia hunto cu CITGO na gobierno Mericano pa splica e embergadura di e problema. Wever a confirma cu na nivel di embahada di Reino, e combersacion lo tuma lugar sea ta awe of mayan, pa haya claridad di kico tur ta envolvi cu e embargo y con por posiblemente sali for di dje of ki efecto esaki por tin a termino largo pa nos isla. Wever Croes a bisa e portal aki como un update riba e situacion di CITGO na Aruba, awor cu a anuncia un ‘slowdown’ di e trabounan di rehabilitacion di e refineria. - Fuente: http://www.noticiacla.com

Retiro di 300 trahador di CITGO ta mescos cu cera un hotel na Aruba
Presidente di ATIA sr. Ronald van Trigt, den conferencia di prensa, a haci un yamada hopi fuerte na Minister di Labor y tambe Ministernan di Husticia, Educacion, y e diferente ministerionan cu mester bay traha hunto cu comercio, pa wak con nan por remedia e tipo di condicionnan desfavorable cu a crece na Aruba y cu awor mester di nan atencion.

Locual ATIA ta bisa, y comercio en general, ta cu nan gastonan ta halto, nan ta sobreviviendo, nan ta den un economia cu no ta creciendo manera mester ta, tin un inflacion relativamente abao, y ademas di esey ta bin acerca e anuncio desagradable cu mas di 300 persona lo wordo retira for di Citgo, cual ta un impacto mescos cu un hotel cu ta cera na Aruba.

“Nos mester tin e realidadnan aki dilanti di nos. Mi ta kere cu nos tin e poder ora nos para hunto pa enfrenta esakinan tambe, pero e puntonan cu a wordo menciona, mester wordo atendi. Pasobra si no wordo haci cualkier ahuste den e ekilibrio economico lo por tin e efecto net contrario di locual Minister di Labor ta buscando”, e presidente di ATIA, enfaticamente, a reitera.

Den ronda di pregunta van Trigt a splica cu 100 florin di aumento di salario minimo pa e trahador ta importante, pero unico aspecto ta cu e mecanismo economico no ta traha asina simple.

Esaki ta bay trece reaccion riba comercio pasobra tur producto y inversion ta bay bira mas costoso y ora cu comercio ta sinti su mes cu na dado momento no por sobrebibi door di cierto factornan, cierto comerciantenan ta haci uso di e trahador cu no ta contribui cu nada y cu ta traha bao di salario minimo unda cu comercio no por competi cune.

E consecuencia di esaki ta cu comercio na lugar di emplea mas hende, menos hende ta haya empleo of hendenan ta wordo retira for di trabao. “Mi ta kere esey ta ultimo recurso cu comercio kier. Esey ta ultimo cos cu nos gobierno kier” sr. van Trigt a subraya.

El a subraya cu tin consecuencianan economico y financiero cu ta bay tuma lugar den cada negoshi, door di aumento di salario minimo sea 100 florin of mas.

“Nos mester corda cu nos ta biba den un economia cu ta un ‘service economy’. Kiermen un gran cantidad di nos labor ta servicio”, el a indica. - Fuente: https://www.diario.aw

‘Anuncio recien di Citgo ta lamentabel y fuera di nos control’

Den cuadro cu e noticia recien di e slow down/paramento di Citgo, parlamentario di fraccion AVP Richard Arends ta reacciona na Bon Dia cu: “Obviamente e ta algo cu nos ta lamenta y ta algo cu ta fuera di nos control.”

E parlamentario ta subraya cu e ta un noticia preocupante pero no mester ta asina cu tin cu cuminsa specula.

“Na momento cu nos a negosha esaki obviamente nos a keda den bon comunicacion cu partnernan internacional y di Reino pa loke ta trata esaki. Manera e ehecutivonan di Citgo a trece dilanti tambe pa nan e situacion no tabata algo cu nan por a premira y cu ta spera un solucion pronto cu obviamente ta fuera di nan control tambe.” E ta sigui bisa cu di otro banda, ta papiando di un ‘slow down’ y no cu ta suspende manera cu a pasa den pasado cu Valero. Pero gobierno actual manera nos a publica den nos edicion di ayera si ta papia di un paramento di e proyecto di rehabilitacion.

Retiro for di AVP
Ayera a cuminsa bay rond un mensahe riba WhatsApp cu aparentemente un reunion cu caracter di urgencia a wordo yama pa exigi retiro di sr. Arends for di fraccion AVP. Esaki segun e texto ta describi ta despues cu ‘e mentiranan di AVP tocante Citgo a keda desenmascara pa Citgo mes.’ E texto ta sigui describi cu ‘Richard Arends a sigura cu Citgo lo trece miyones pa Aruba y awor a resulta cu ta mentira.’ Sr. Arends a confirma cu Bon Dia cu e rumor aki di su retiro ta ‘fake news’ pa bruha tera.

Obligacion cu Aruba
Citgo ta keda paga nan huur, impuestonan y contract ta keda na vigor pues nan ta keda cumpli cu nan obligacion cu Aruba. Cualkier retraso di e rehabilitacion ta den cuadro di e contract, segun sr. Arends. E unico cos ta cu e prome fase di e rehabilitacion no ta bay keda cla manera cu nan a premira. Pa loke ta trata entradanan di gobierno, esey tambe ta garantisa segun sr. Arends. “E ta algo cu tanto partido AVP y MEP e tempo ey a aproba e acuerdo aki mi ta kere na beneficio di nos tur. Den pasado pro activo si den situacionnan asina, pero nos ta wak cu e ta awo na cada ken nan tempo di bestuur.” E parlamentario ta sigui bisa cu e noticia ta preocupante pero di otro banda no por specula cu si of no; e ehecutivonan tabata hopi cla cu lo suspende operacionnan tanten resolve e asunto aki. “Obviamente esaki no ta cay ainda den un breach of contract den cuadro di e tempo cu ta wordo duna pa rehabilita e refineria.”

Rehabilitacion di mala fe
Otro comentarionan cu ya caba ta bayendo rond den comunidad ta cu henter e asunto aki di rehabilitacion di nos refineria a wordo haci a base di mala fe, pa solamente beneficia algun persona. Na esaki sr. Arends ta reacciona cu: “Esaki ta di miho buena fe cu tabata tin. E ta un contract cu nos a negosha hopi largo riba dje cu ekipo tecnico, legal y ta algo cu oposicion a aproba. No ta un cos di AVP, e ta un cos di Aruba. Citgo ta un empresa cu ya caba a gasta 160 miyon y mi no ta kere ta pa smaak nan ta slow down e operacion.”
Sr. Arends ta sigui splica cu mester compronde cu ainda tin mas cu 300 hende emplea. Den e refineria mes ainda tin actividadnan andando pero e impacto mas grandi ta e man camp segun sr. Arends. Ta akinan lo bay mira e ‘slow down’ mas hopi. - Fuente: http://www.bondia.com

Gobièrnu arubano ke diskushon nashonal riba futuro di refineria

Gobièrnu arubano ke kuminsá ku un diskushon nashonal, riba término, tokante e futuro di e refineria riba e isla. Asina premier Evelyn Wever-Croes ta bisa, reakshonando riba e anunsio di e operadó di e refineria, Citgo, ku esaki ta posponé hasimentu operashonal di e refineria.

Ayera Citgo a anunsiá ku e ta ‘bai frena’ e trabounan pa hasi e refineria operashonal di nobo. E mas ku 300 empleado direkto lo keda den servisio ainda, pero lo manda e mas ku 300 persona ku ta traha na e refineria via kontratista kas.

Sképtiko
Wever-Croes ta bisa di no ta sorprendé ku e anunsio. Ora gobièrnu a asumí kargo, e premier tabata sképtiko kaba tokante e trabounan ku ya tabatin retraso formal.

Awor e ta indiká di tabata na altura tambe di advertenshanan di tantu Merka komo Hulanda pa e gobièrnu arubano anterior, en konekshon ku posibel riesgu enkuanto kolaborashon ku Citgo. Segun Wever-Croes ta bisa, e kabinete Eman II tabata avisá pa e sanshonnan ekonómiko ku e tempu ei tabata den tapara ainda.

‘E gobièrnu anterior tabata avisá pa riesgunan enkuanto un kolaborashon ku Citgo’ – Evelyn Wever-Croes.
Ta te den 2020 Aruba i Citgo por sinta na mesa pa trata un posibel disolvimentu di e lease, Wever-Croes ta bisa. Pero tòg lo buska manera pa hasi esaki mas promé, e ta bisa mas aleu.

Diskushon nashonal: no un referèndùm
Si disolvé e lease, Wever-Croes ke kuminsá un diskushon nashonal riba e futuro di e refineria. Un referèndùm sí e lo no bira, segun e premier. E no ta kita binida di un operadó nobo for di mesa mesora, pero e ta indiká ku su preferensha ta bai pa konstrukshon di un pilar ekonómiko nobo na e sitio kaminda e refineria ta pará ainda.

Citgo ke lobby serka outoridatnan merikano pa haña un dispensashon pa e fasilidat na Aruba tambe i a pidi gobièrnu arubano pa partisipá den e esfuerso akí. Premier Wever-Croes no ta sinti muchu p’esei, aworakí.

Sanshonnan Venezuela
E motibu pa posponé e trabounan ta e sanshonnan ku gobièrnu merikano a anunsiá pa Venezuela. Por ehèmpel, lo limitá finansiamentu di empresanan ku ta operá na Merka ku ta den mannan venezolano.

Dispensashon di sanshon
Tantu Citgo Petroleum komo Citgo Aruba, ku ta lease e refineria di pais Aruba, ta empresa yu di e kompania petrolero nashonal di Venezuela PdVSA. Citgo Petroleum a haña dispensashon di e sanshonnan di e gobièrnu merikano. Citgo Aruba a kai chikí den esaki, loke ta pone ku invershonnan nesesario, djafó, a bira virtualmente imposibel. - Fuente: https://retkaribense.ntr.nl


CITGO CU RETIRO MASAL DI 345 TRAHADO CU E SLOW DOWN DI REHABILITACION

E situacion di refineria tin atencion di henter e pueblo e momentonan aki. Notable ta cu tempo MEP tabata den opocision, nan a expresa cu nan tin solucion pa reapertura. Hasta a bay te na porta di e refineria un anochi y mustra cu Ora Cero a yega. Por a mira cuanto biaha Glenbert Croes den opocision tabata haci expresionnan masha fuerte mes. Esnan cu tabata sigui MEP di cerca, hasta na dado momento a kere cu ta MEP mes cu Glenbert Croes a habri e refineria. Su biahenan pa atende asuntonan personal na Venezuela tabata wordo disimula comosifuera ta cu PDVSA e tabata bay reuni. Esnan cu tabata kere e storianan di MEP e tempo ey tabata expresa cu e logro tabata di Glenbert Croes den opocision y unico rol di AVP tabata oficialmente como gobierno firma e acuerdo cu CITGO. Awe Minister Glenbert Croes como mandatario a cambia su tono 180 grado y a expresa publicamente cu e no por mete pasobra ta prome minister ta e mandatario encarga cu energia. Mientrastanto nos ta para den un crusada caminda CITGO mes a confirma por escrito riba preguntanan, cu nan lo retira algun 100 trahador trahado directo cu CITGO. Esaki sin kita esnan trahando cu contratista cual varios a wordo manda cas. Nos ta bay pone e preguntanan haci na CITGO y e contestanan por escrito cu nan a manda bek.

PREGUNTA (1) NA CITGO: KICO TA BAY PASA CU E TRAHADORNAN? TA BAY KITA TRAHADOR?

Contesta di CITGO: Lastimamente un tiki mas cu mitar di e 645 trahador di refineria lo mester bay pero mas di 300 trahador lo wordo manteni pa traha den e operacionnan di terminal y marino.

PREGUNTA (2) NA CITGO: CUANTO TRAHADOR TIN ACTUALMENTE DEN E REFINERIA Y CUANTO LO KEDA?
Contesta di CITGO: Tin actualmente 645 trahador den refineria. Mas cu 300 trahador lo wordo manteni pa traha den e operacionnan di terminal y marino cu ta keda activo.

PREGUNTA (3) NA CITGO: LO TERMINA CONTRATONAN CU CONTRATISTA?
Contesta di CITGO: CITGO Aruba actualmente ta den discusion tocante e situacion cu cada contratista di e proyecto.

PREGUNTA (4) NA CITGO: TABATA TIN ADELANTO DEN E REHABILITACION?
Contesta di CITGO: Si. E fase di ingeniería tabata andando y un man camp di 1.200 a keda construi pa por duna alohamiento temporal na e trahadornan inicial cu mester bin pa e projecto.

PREGUNTA (5) NA CITGO: KI ESFUERSO A WORDO HACI PA OBTENE FINANCIAMENTO?
Contesta di CITGO: E sancionnan mericano y gobierno di Merca cu te cu awor no a duna autorizacion/ alivio a haci financiamento di e projecto imposible na e momentonan aki. CITGO a reuni na varios ocasión cu representantenan di gobierno di Merca encarga cu e sancionnan pero e timeline pa un decisión di gobierno di Merca relaciona cu e tópico aki no ta duidelijk awor aki.

Mientrastanto cu 345 trahador directo di CITGO ta wordo manda cas, por a scucha e interes tambe di prome minister totalmente diferente di loke tabata den opocision. E gritonan cu tin hende of contacto pa habri e refineria no ta wordo scucha mas manera antes. Esey nifica cu e gritonan den opocision claramente tabata uno pa gana popularidad den pueblo. Tabata cuestiona gobierno di AVP tur dia mientras nan tabata traha pa negocia e contrato pa reapertura di e refineria. Awendia e cos a cambia y por a conclui cu e chens ta grandi cu gobierno mes no lo haci masha pa scapa e refineria of logra habri esaki bek.

Den e gobernacion actual tin otro minister cu no ta di MEP cu ta contra e refineria. Esey naturalmente ta pone e tono di e prome minister cambia. Mescos tin parlamentario femenino cu awe ta sostene e coalicion cu a vota tempo AVP tabata na mando conta mocion pa reapertura di refineria. Esey nifica cu pa garantiza e existencia di e gobierno, e chens ta grandi cu MEP no ta bay pusha pa asina e refineria habri bek. Si MEP insisti por mira cu e minister lider di POR y Parlamentario Marisol por bay contra e deseonan di MEP. Esey ta confirma cu MEP a laga full nan ideologia cay y refineria no ta cabay di campaña mas.

Interesante pa sa kiko lo bay sosode cu e 345 trahadornan cu na cualkier momento lo wordo manda cas. - Fuente: http://24ora.com


Tentativo: reunion entre director di Citgo Aruba y sindicato IOWUA dialuna awor

E anuncio di Citgo pa bay den un situacion di slow down indefini (y segun gobierno nan a para e proyecto) cu ta practicamente un shut down, ya cu a wordo anuncia e retiro di cantidad di trahado cu tabata traha den e refineria na San Nicolas.

E noticia aki a causa un conmocion den nos mercado laboral. Inicialmente cerca e trahadonan na servicio di contratistanan envolvi den e trabou di rehabilitacion di e refineria. Pero tambe cerca e trahadonan cu ta traha na servicio directo di Citgo. A pesar cu ta wordo bisa cu e ‘slow down’ lo no perhudica nan.

Mediador di gobierno Anselmo Pontilius ta indica cu prome cu e anuncio aki a wordo haci formalmente, ya sindicato IOWUA a expresa su preocupacion caba fin di aña pasa. Nan a solicita un reunion den cual nan a pidie pa coordina tanto cu director di Citgo Aruba, Raymond Buckley, y tambe cu un contratista. E reunion aki mester tuma luga dialuna ultimo, y el a wordo posponi tentativo pa dialuna 26 di februari awor.

Sr. Pontilius ta haya logico cu e reunion lo bira mas urgente mirando e declaracion haci vice presidente di Citgo, James Cristman, cu a anuncia e slow down loke a pone den peliger e cupo di trabou di e hendenan cu ta labora den e refineria.

“E ta un preocupacion. Nos a anticipa esaki un poco caba algun siman pasa.” Mediador di gobierno ta haya necesario y mas urgente pa bay mesa cu e gremio sindical pa evalua con ta bay atende cu e situacion aki. Esaki ta un recomendacion cu a wordo haci na e minister di labor. Ya caba minister Glenbert Croes a anuncia cu lo convoca un reunion urgente pa explora ki responsabilidad y autoridad e tin pa cu e trahadonan na servicio directo di Citgo como tambe pa e companianan contrata pa Citgo.

Tin otro situacion di riesgo pa otro grupo di trahadonan debi tambe na e crisis di Venezuela y companianan aereo cu no a ta operando mas pa e pais bisiña aki. Segun mediador di gobierno su sugerencia, e ta haya cu mester haci un evaluacion con esaki ta afecta e desempleo y si tin espacio unda nan por ubica e trahadonan cu ta kedando sin trabou. - Fuente: http://www.bondia.com

Fuente: Agencias

No hay comentarios:

Publicar un comentario

Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.

LEA...

 
LO + LEÍDO...

LO + LEÍDO...