(Aruba) Delegacion di PDVSA Gas lo ta na Aruba

Aruba ta preparando pa ricibi un delegacion grandi di PDVSA Gas pa papia riba e ultimo desaroyonan riba e tereno aki cu Minister di Energia Mike de Meza y su conseheronan. Esaki ta loke e mandatario a anuncia dialuna ultimo durante un conferencia di prensa.

Esaki lo ta di dos bishita di e delegacion na Aruba, despues di esun di aña pasa, unda cu e punto principal ta combersacion riba e tubo di gas cu mester worde instala entre Venezuela y Aruba. ”Esaki ta un proyecto grandi cu ta bay costa entre 150 pa 200 miyon Dollar. E tubo aki ta haci posibel cu e refineria, ora cu e ta cla pa operacion, por haci uzo di gas natural y no e fuel oil pisa cu pa casi 100 aña a uza den operacion di e refineriana Aruba, ”de Meza a splica.

E uzo di gas den operacion di e refineria lo trece un cambio grandi, principalmente pa esnan cu ta biba den bisindario di e refineria y pa Aruba e lo nifica un cambio grandi pa medioambiente.

Na mes momento, e mandatario a splica, tin diferente reunion tumando luga pa realisacion di e Proyecto di Algen, den cual tanto e multinacional CITGO como Gobierno di Aruba (Refineria di Aruba) ta envolvi den dje. Tin diferente otro instancia cu ta traha riba tereno di sostenibilidad cu ta envolvi hunto cu expertonan local y internacional. “E proyectoaki ta uno hopi interesante cu ta bay haya atencion internacional,”e mandatario a sigura.

Un di e condicionnan cu Gobierno di Aruba a pone den e negociacion cu CITGO ta pa e refineria, cu ta importante pa pais Aruba, opera a base di gas natural, cu ta un sistema hopi mas limpi cu e heavy fuel cual a causa hopi problema pa e habitantenan rond di e refineria, principalmente ora cu biento cambia di direccion.

Durante e conferencia di prensa Minister Mike de Meza a papia ampliamente riba e ultimo desaroyonan di inicio di e trabaonan pa rehabilita e refineria. El a desbarata un pa un tur critica di opositornan, tambe el a papia di e hendenan cu a worde tuma na trabao caba y tur e otronan cu ta bay worde tuma den servicio.

Fuente: http://www.diario.aw