(Aruba) Keto bay no por drenta Aruba cu Pan de Jamon of Ayaca di exterior

Departamento di Aduana ta recorda tur persona viahando pa exterior y cu lo bay haci compras di articulonan pa uso personal of negoshi pa tene cuenta cu na yegada na Aruba tin cu declara e mercancia debidamente na Aduana. Pa algun producto pa uso personal te na cierto valor ta posibel pa importa sin cu ta necesario pa paga invoerrechten.

Na mesun momento Departamento di Aduana ta haya cu e ta necesario pa informa tur e personanan cu ta biaha pa e paisnan den e region di Sur-of Central America (Venezuela, Colombia etc) pa nan tene cuenta cu e reglanan cu tin prescribi den e ley yama “Slacht en Keuringsverordening”.

Den e ley menciona ta estrictamente prohibi pa importa carni of preparacionnan traha di carni manera “Ayaca of Pan de Jamon” cu ta bini for di Sur – y Central America ta prohibi pa drenta Aruba.

Si tin personanan cu ta bini for di un pais di Sur- of Central America y ta trece e tipo di mercancia aki cu’ne esaki tin como consecuencia cu Departamento di Aduana lo kita e mercancia y despues entrega esaki na Veterinaire Dienst cu lo destrui e mercancia aki.

Viaheronan y importadornan (di carga) mester ta conciente di e reglanan prescribi den diferente ley encuanto importacion of exportacion di mercancia of transportacion di mercancia for di Aruba cu ta rekeri un permiso y/of cu ta prohibi. Ehempel di mercancianan prohibi ta carni of preparacionnan traha di carni (ayaca, pan de jamon, ham), droga, remedi, mata, bestia y armanan (di candela).

Den caso cu e biahero/ importador of exportador di carga no por presenta un permiso, Departamento di Aduana lo wanta e mercancia y esaki lo por tin como consecuencia cu e persona ta haya un multa y/of lo por worde deteni. Alavez e mercancia lo por worde destrui.

Departamento di Aduana ta haci un suplica na un y tur pa tuma bon nota di e aviso aki pa asina evita cualkier inconveniencia cu por surgi durante control di Aduana.

Fuente: http://www.diario.aw