(Aruba) Parlamentario mr. Xiomara Maduro: Minister Eman ta bolbe pone Aruba su cara na berguensa

Desde cu Minister Eman a yega na poder, nos Pueblo su cara ta na berguensa. No solamente el a sa di traha un MEGADEBE perhudicando hopi generacion, e mandatario a sa di haci cosnan foi sla cu ta pone e cara di nos Pais na berguensa. Na 2014 tabata e welga di hamber den cual Minister Eman a haci full un show cu no ta pas pa un Minister President haci y sigur no cu tur e insulto cu el a haci’e y tur e odio cu el a fomenta contra nos Gobernador Refunjol den representacion di Cas Real na nos Pais. Awo na 2016 Minister Eman ta bolbe pone Aruba su cara na berguensa, e biaha aki cu e nombracion di e Gobernador nobo pa nos Pais.

Na man di Eman nada no ta normal mas

Aruba a conoce nombracion di 3 Gobernador. Tur a bay na un forma netjes y sin mucho comentario of critica. Pero na man di Minister Eman nada no ta normal mas y tur cos ta bira drama. Den e procedura cu a sigui semper pa nombra un Gobernador nobo, e Pais en cuestion ta compila un lista di tres persona cu nan ta haya apto pa e funcion di Gobernador. E lista aki ta wordo presenta na Hulanda, na unda cu despues di un proceso di screening Hulanda ta nombra segun custumber e prome persona riba e lista. Di e manera ey Hulanda ta tene na consideracion e deseo di e Pais pa wordo representa pa un persona cu nan ta haya bon pa e posicion, cu ta gosa di respet amplio den comunidad y tambe di e otro partidonan representa den Parlamento. Ta un procedura cu semper a bay normal, pero e biaha aki a bira un drama na man di Eman ya cu Hulanda no a acepta ningun di e tres persona cu Gabinete Eman a propone pa e puesto.

Ta bolbe lastra hende drechi

E berguensa mas grandi no ta cu Hulanda no a acepta e candidato di Gabinete Eman pa Gobernador, esta Minister Bermudez. E berguensa ta e manera cu Minister Eman a scohe pa atende cu e nombracion di sr. Alfonso Boekhoudt como nos Gobernador nobo. Minister Eman a fomenta un campaña pa difama y lastra e bon nomber di sr Boekhoudt. Minister Eman a laga su hendenan yama radio y yama e Gobernador nobo pa traidor, laga su hendenan scirbi articulo cu informacion tendecioso y hasta a bay asina leu di hinca informacion di salud di un miembro di famia di e Gobernador nobo den e lastramento aki. Y si esaki no ta suficiente Minister Eman a bira kita sr Boekhoudt foi trabou y duna publicidad na esaki na un manera bou tur nivel. Di e manera aki, mescos cu a haci cu nos Gobernador Refunjol, Minister Eman a bolbe recuri na un politica di riool pa asina laga lastra hende drechi den nos comunidad pa tapa su propio fayonan.

Eman ta keda un loopjongen

Tur e drama aki por a wordo evita si Minister Eman a asumi su responsabilidad di goberna nos Pais na un manera drechi. Bou su maneho tur respet a bay perdi pa Aruba. Cu e nombracion di nos Gobernador nobo ta bolbe bira bisto cu Hulanda no tin ningun respet pa Minister Eman y ta wals riba dje na tur momento. E ta simpel, si largo bay Minister Eman a haci trabou di loopjongen y no a sa di defende Aruba den nada, e no por spera cu na Hulanda nan lo tume na serio ora e kier actua manera un Minister President di un Pais den Reino. Minister Eman ta keda un loopjongen cu cada ves ta pone Aruba su cara na berguensa.

Fuente: http://masnoticia.com