(Aruba) Alvin Koolman: “Ta un honor hopi grandi pa mi bira e Prome Director General di Refineria Aruba”

Director di Aruba Refinery Company, señor Alvin Koolman, a hiba palabra durante conferencia di prensa di Gobierno, Dialuna awor. E funcionario a menciona cu e ta sinti su mes hopi honra cu e nombramento como e prome Director General di Refineria Aruba, ya cu e ta bay forma parti den henter e proceso, no solamente di rehabilitacion di e refineria, sino durante e añanan di contrato di operacion.

E prome etapa ta cinco aña y e ta sigur cu lo tin extension pa diez aña despues di esaki.

“Ora mi a cuminza cu LAGO na aña 1979, como hoben semper nan ta bisa bo cu esaki ta un industria cu tey pa semper. Bo, ingenuo, semper ta kere cu esey ta berdad. Y cu gran sorpresa, ora cu nan a anuncia e ciere na 1984 ora e rumornan a cuminza core mi a para keto y puntra mi mes ‘con e ta posible cu un industria cu tey pa semper ta cera su portanan’. Despues cu LAGO a cera mi a bay traha na Curacao y un tempo despues Shell Curacao tambe a cera. Esey a pone mi, personalmente, masha interesa kico ta e motibo di ciere di industrianan grandi asina”, sr. Koolman a comparti.

El a sigui conta cu e ora ey el a haci investigacionnan durante añanan encuanto refinerianan cu a cera na aña 80 y despues, y a ripara cu un refineria ta mescos cu cualkier negoshi. “Si e no ta gana placa of su pronostico ta cu no ta gana placa, e ta cera” Koolman a expresa.

“Lamentablemente, hopi biaha mas cu nos tabata tin sesenta aña cu LAGO y 70 aña cu Shell, e politica di nos gobiernonan di Antiyas y Aruba, no a wordo aconseha kico ta e pasado di e mundo di petroleo mes. “Y si nan no tin un vision of un motibo cu nan ta haya sa, nan lo a haya sa cu LAGO for di aña 79 caba tabata na peligro pa cera y Shell sigur mescos”, Alvin Koolman a menciona.

E funcionario a expresa cu ora Minister Mike de Meza a yame pa forma parti di e ekipo di negociacion cu Citgo el a acepta, y for di prome cu esey mes durante e periodo cu Valero a mustra cu nan ta bay cera porta, el a dune hopi conseho “Y pesey para akinan dilanti mi ta bisa boso cu pa mi bira e prome Director di e refineria ta un honor bastante grandi, y pa personalmente mi por a vigila tur e contratonan cu nos a cera cu CITGO y garantiza e operacion di aki te e proximo 15 aña” Koolman a subraya.

Fuente: http://www.diario.aw