(Aruba) CEO Nelson Martinez “E acuerdo ta un partnership strategico cu ta na bienestar di tur envolvi”

Den e ultimo edicion di e revista ‘Aruba Dushi Tera’ a sali un entrevista cu Presidente y CEO Nelson P. Martinez di CITGO Petroleum Corporation unda e ta trece varios punto interesante dilanti. Un splicacion amplio encuanto e deal cu CITGO y e demas partnernan envolvi, cu e ta cualifica como partnernan strategico. E deal cu CITGO ta ofrece Aruba y sigur San Nicolas un bon futuro.

“Tanto den sentido tecnico como financiero nos tin un bon futuro nos dilanti na San Nicolas”, asina el a cuminsa splica. Esaki den cuadro di e acuerdo cu e compania a logra cu pais Aruba. Por lo pronto e refineria ta worde geleased pa e periodo di 15 aña. Segun Martinez e acuerdo ta un partnership strategico cu ta na bienestar di tur envolvi. “CITGO Aruba, PDVSA, Venezuela y Aruba, tur ta gosa di e economisacion riba tereno di transporte, energia y ora di stock productonan petrolero. Door di haci uzo completo di e infrastructura ya existente nos ta probecha optimalmente di e lago petrolero mas grandi na mundo, e Orinoco Oil Belt.”

E asina yama ‘petroleo crudo’ cu ta worde saca eynan, mester worde mehora prome cu e por worde refina y bira combustibel. Pa e proceso di mehoracion e refineria na San Nicolas cu un capacidad di 209.000 bari pa dia, ta extremadamente adecua.

“Pa por trece e instalacionnan na e nivel rekeri, mester di un inversion di 450 pa 650 miyon Dollar. Aki un aña y mey pa dos aña e petroleo ta cuminsa ‘core’,” Martinez a bisa. E ta convenci cu despues di e conversion, e refineria ta bay trece prosperidad economico pa tur partido envolvi. Martinez a splica cu nan tin un proceso bon pensa tras di lomba, cu sosten di e miho conseheronan tecnico cu tin dentro di CITGO

Petroleum Corporation y PDVSA. “Aparte di esaki nos a haci uzo di e servicionan di algun di e miho companianan di brinda conseho den e industria petrolero manera KBC Advanced Technologies y KBR di Alemania.”

E rol di e refineria di Aruba ta pa converti e petroleo crudo den componentenan liviano. “Contrario na e petroleo den su forma original e productonan liviano aki ta bay den e netwerk di CITGO na Merca unda ta sigui traha riba nan te yega na e producto final.” Den e contracto di lease ta poni cu e refineria mester traha riba gas. Esey tabata un punto non-negotiable pa gobierno di Aruba. Martinez:

“Pa nos un pipa entre Venezuela y Aruba ta e manera mas economico pa trece e gas. Na Paraguana tin gas na abundancia cu ta mucho mas barata cu fuel-oil. Un otro bentaha ta cu e emision di productonan dañino ta baha asina tanto cu medio ambiente casi no ta sufri daño.” CEO Martinez tin tur confianza den futuro: “Durante nos ultimo proceso di deliberacion nos a traha hopi bon cu e delegacion di Aruba, asina ta cu nos ta sigui traha cu nan como bon partnernan.”

Fuente: http://www.diario.aw