(Aruba) Apertura di CITGO otro luna ta mustra scur

Tur cos tabata planea pa cuminsa cu trabaonan pa restablece e planta pa dia 1 di augustus. Pero pa por alcansa e fecha mester a pasa e leynan corespondiente den Parlamento.
Sinembargo a ripara cu no ta logra y a cambia e fecha di inicio pa dia 1 di september, pero awor ta resulta cu ni e fecha ey tampoco ta alcansabel!

Mientras cu economia di nos isla ta pendiente pa habri un di dos pilar economico, den forma di un “upgrader” na e refineria na San Nicolas, ainda e procesonan legal, fiscal y di recursonan humano ta leu di cla. Un fuente cerca di e negosacionnan a confirma na nos awe cu september ta mustra scur, pues cu lo no keda cla den e siguiente simannan pa por start cu trabounan na e refineria na San Nicolas. Ta pronostica cu lo tin 1 pa 2 luna mas di trabou prome cu por cuminsa.

E reto mas grandi awor ainda ta e procesonan fiscal. E compania PriceWaterhouseCoopers ta negociando den nomber di Refineria Valero cu Gobierno. Ey tin un suma basta halto di 6 aña di impuesto y disputa cu mester regla. E suma final ta core di hopi miyon florin, cu Gobierno ta sperando cu brasa habri.

Di otro banda, e Refineria no ta di acuerdo cu e forma con Gobierno, por medio di Departamento di Impuesto y Cuerpo di Aduana ta aplica e cobransanan, por ehempel cu kier cobra accijnzen riba combustibel cu e refineria ta uza den su planta pa procesa productonan petrolero. Esey ta por lo menos un di e disputanan, cu nos a compronde.

Otro asunto cu ta tumando su tempo ta e terenonan cu DIP mester verifica cu e refineria tin y cu awor nan mester pasa bek na Gobierno.

Esaki tur sin kita cu CITGO awor mester tuma e trahadonan di Valero over, di acuerdo cu e cambio den ley. Tin mas o menos 100 empleado den e refineria cu lo pasa automaticamente di Valero pa CITGO, cu tur nan añanan di servicio y nan salario/beneficionan. Ta parce cu e salarionan na Valero ta mas halto cu na CITGO y PDVSA, pues ta un asunto cu internamente e compania mester atende y regla.

Tin e impresion cu Gobierno di Aruba a inverti 6 pa 7 luna pa negocia cu CITGO, pero di forma eroneo a imagina cu den 2 siman lo keda cla cu e negociacionnan cu Refineria Valero, locual ta imposibel. Den esaki ta hunga un rol cu hopi empleado publico ta cu vakantie y ta tarda e proceso di duna contesta riba e preguntanan di e refineria pa tur loke tin cu regla for di banda di Gobierno pa cu e compania saliente di nos isla.

Ora cu keda cla cu e negociacionnan cu Valero, e ora mester prepara un cantidad di ley pa pasa den Parlamento, tanto esunnan pa absolve Valero, esunnan pa cu CITGO, creacion di e compania Refineria di Aruba, traspaso di e actividadnan di Valero Marketing pa un otro compania di Gobierno y asina por sigui menciona. Ta evidente cu abogadonan, tanto e bufetenan na Aruba como esunnan na Merca ta “druk bezig” e ultimo lunanan pa cu e traspaso aki.

Fuente: http://www.diario.aw