(Aruba) Kier mira tur yiu di tera y contratistanan local bek den Refineria

Segun Glenbert Croes di MEP, tumando nota di e noticianan internacional y nacional pa purba descacredita e proyecto di reapertura di e refiineria cu PDVSA CITGO, e ta sinti su mes, “yama” pa duna su opinion y reflexion riba e tema aki.

“Prome mi kier expresa cu mi persona y niun hende di MEP no a ricibi niun placa ni bao mesa ni riba mesa relaciona cu e proyecto aki, PDVSA CITGO no a paga niun gasto di viahe o otro ni pami ni pa nos den e esfuerso aki pa habri e refineria di Aruba, nos no tabata tin niun narco magnate petrolero den persona di Roberto Rincon pa wine and dine nos y duna placa manera e si a haci cu Gobierno di Aruba y Mike Eman Ministro Presidente di Aruba,” Croes a relata.

“Mi ta expresa esakinan pa tur hende compronde cu e unico motivacion y interes cu nos di MEP tin den defende e proyecto di Reapertura di refineria di ARUBA ta e interes di nos pueblo.”

Glenbert Croes a sigui bisa: “Ora cu mi expresa mi opinion riba e tema aki tambe mi ta pone mi mes den sapato di tur e yiunan di tera cu a perde trabao cu e refineria, tur e yiunan di tera cu mester a bay den exterior pa traha, y den sapato di tur e contratistanan local y nan trahadornan cu a bay failliet of mester a “size down” nan actividadnan di negoshi.”

Y pa tur e cuponan di trabao cu lo worde crea cu bon salario cu e reapertura di e refineria mi ta Pro e acuerdo cu Pdvsa Citgo, pa tur e yiunan di tera cu lo bin back nan Pais pa traha back cu e refineria mi ta pro e acuerdo cu Pdvsa Citgo. Pa tur e contratistanan local y nan trahadornan cu lo haya contract back cu e refineria mi ta Pro e acuerdo cu Pdvsa Citgo.

Ademas e comercio y progreso cu e reapertura di e refineria lo trece back pa San Nicolas en particular y Aruba henter, cual impacto economico na fabor lo ta no menos cu 15% di nos GDP. E inversion den e rehabilitacion di e refineria lo ta no menos cu US$ 1.2 billion Dollar. E hecho cu e refineria lo opera a base di gas lo haci cu e refineria lo opera di forma mas limpi pa nos medio ambiente y economicamente rendabel pa e propio refineria, e gas lo worde haci disponibel pa WEB haci su conversion di su operacion a base di gas cual lo ta miho pa nos medio ambiente y mas economicamente rendabel pa WEB, pero tambe finalmente nos lo por asina baha prijs di awa y coriente permanentemente pa nos pueblo door di elimina e factor brandstof clausule den e structura di prijs di awa y coriente y elimina e crimen economico cruel contra nos pueblo di hedging.

Gobierno di Aruba lo ricibi mas entrada cu Pdvsa Citgo compara cu VALERO door di e curashi di partido MEP expresa door di mi persona den mi reuion un aña pasá cu PDVSA unda mi a propone pa saka VALERO afor y pa Gobierno di Aruba bira doño di e refineria y pa nos usa e modelo Corsow pa nos lease e refineria pa cual awe Gobierno di Aruba lo tin danki na e proposicion aki dos entrada: Lease income y tax income: Belasting directo y indirecto.

Pa tur e motibonan aki mi ta pro e reapertura di e refineria y pro e acuerdo pdvsa citigo cual nos Partido y humildemente mi persona a lucha sumamente duro pa logre. Y awor cu nos a logre nos mester gradici nos Todopoderoso cu nos a worde brindá como Pais y Pueblo. Ademas mi no kier ni pensa pa nos na aruba keda depende di turismo so y si esey pasa den tempo dificil kico lo pasa si nos no tin nos otro pilar economico.

El a termina bisando: “Pesey mi ta pro e refineria di Aruba su reapertura cu Pdvsa Citgo”.

Fuente: http://www.diario.aw