(Aruba) Abogado Chris Lejuez no ta kere cu su cliente ta envolvi den e caso di placa scondi den carni di galiña

Tin di compronde cu tin un persona, cliente di abogado Chris Lejuez, kende tabata cera na Venezuela, a wordo extradita pa Aruba. E abogado a splica cu den caso cu ta conoci como Cash Kit, unda cu a bin placa den container lora den carni di galiña, cu ya ta mas cu 9 luna pasa polis a haci inval na diferente cas na Aruba y nan a duna un ordo pa laga detene su cliente kende tabata na Venezuela e tempo ey.

El a wordo deteni eynan y te awor aki, el a wordo treci Aruba, despues di a pasa un procedura di extradicion sumamente largo na Venezuela.

Diadomingo abogado Lejuez tabata na warda di polis pasobra e interogacionnan a cuminsa. Durante cu henter e caso aki a tuma luga, e cliente no tabata na Aruba. E tabata na Venezuela, unda cu su casa ta biba, hunto cu su yiunan y e no ta compronde eigenlijk pakico nan tabata tin’e deteni den e caso aki.

Loke a pasa ta cu posiblemente e conoce e personanan envolvi, pero no cu e tin involucracion den e caso. E no tabata scondi na Venezuela manera cu tabata wordo papia. E ta bay Venezuela regularmente, su casa ta bisa na Venezuela. E ta un persona cu tin nacionalidad Hulandes. Pesey e no tin estadia na Venezuela.

Cada tres luna e tin cu bin bek Aruba. Na Aruba e tin su cas y cada tres luna e ta bin bek keda algun dia despues pa e bolbe bay bek cerca su casa. El a wordo deteni riba peticion di Ministerio Publico di Aruba na Venezuela, pa extradit’e pa Aruba.

El a wordo extradita pa pais Venezuela pa pais Aruba. E sospechosonan principal di e caso aki ta liber caba. Abogado Lejuez a papia cu fiscal riba esey. El a bisa cu e ta haya ora cu e otro dos sospechosonan principal a wordo laga caba den libertad bao di cierto condicionnan cu huez comisario a pone, cu ta na su luga pa e cliente di dje tambe haya e mesun condicionnan aki pa nan por suspende su detencion tambe.

Fuente: http://www.diario.aw