(Aruba) Instancianan a tene reunion encuanto e “situacion” di bishitantenan Venezolano

Diahuebs atardi Minister Otmar Oduber conhuntamente cu diferente stakeholders den turismo y entidadnan cu ta representa e sector comercial a sinta na mesa pa discuti e situacion di e bishitantenan di Venezuela.

Mirando cu ATIA a saca un comunicado riba un topico cu tanto Gobierno como tur e diferente partnernan den turismo, ta trahando riba dje e ultimo tempo aki, a mira e necesidad pa sinta hunto pa intercambia informacion.

Entidadnan manera Aruba Hotel And Tourism Association, Aruba Tourism Association, Aruba Timeshare Association, Aruba Airport Authority, SIAD, DTP, ATIA, Camara di Comercio y Aruba Bankers Association tabata presente durante e reunion aki.

ATA a duna un presentacion riba kico e division entre e mercado Venezolano ta. Ta importante pa mantene e mercado aki mirando cu nan ta e di dos mercado turistico principal pa Aruba.

Ta netamente e grupo aki ta esun cu ta contribui mas tanto na nos economia na momento cu nan ta bishita nos. Pero e efectonan di ultimo tendencia awor mirando e situacion politico na Venezuela, ta pone cu tin un grupo cu ta bini Aruba y purba bay back cu mas tanto Dollar posibel.

Minister Oduber ta splica cu su colega Minister Bermudez conhuntamente cu SIAD y tambe ATA ta registrando y bishitando tur e adresnan cu na e momentonan aki e hendenan ta kedando na dje, pa e personanan aki tambe contribui y cumpli cu nan deber di impuesto cu ta bin cu e negoshi aki. Durante e reunion SIAD a duna un indicacion cu esaki ta andando, y a ricibi hopi reaccion di hendenan cu a cuminsa regla nan negoshi mientras otronan a ricibi cobransa. Tabata tin un comision encabesa pa ATA conhuntamente cu Brandweer, Departamento di Salubridad y Cuerpo Policial cual a bishita mas di 100 adres, y lo continua pa bishita mas, pa mira cu e calidad cu e adresnan aki ta ofrece ta uno cu lo por continua cu e negoshi of cu lo mester para e actividadnan aki.

Minister Oduber ta bisa: “Mester percura si pa no generalisa un mercado asina importante pa nos. Nos mester tin e medidanan cu nos ta tuma na nan luga pa atende cu e fenomeno cu nos no kier mira crece.” ta referi na medidanan cu lo keda trata durante reunion di Conseho di ministronan diabierna y lo keda anuncia pa cada Minister na su debido momento. “Tin atencion di Gobierno riba tur e nivelnan cu ta atendiendo cu esaki y nos a informa tur e gremionan cu tabata den e reunion cu nos pa nan por tin un idea cu e preocupacionnan cu ta biba, naturalmente ta biba cerca Gobierno tambe y ta ricibiendo e atencion.”

Tanto ATIA como Camara di Comercio a sali satisfecho cu e informacion ricibi mirando cu hopi ta e accionnan tumando luga y ta spera cu lo continua riba e bon caminda aki. Ta importante pa nan ta na altura y tin e informacion adecuado pa nan por traspasa esaki pa nan miembronan. Despues di e reunion awor ambos tin un miho bista di e maneho cu ta hibando pa frena un fenomeno creciente riba nos isla.

Minister Oduber ta bisa:” E preocupacion ta cerca tur hende pa algo cu nos no ta custuma cu ne, cual ta un turista cu ta bin bishita nos pa hiba e Dollar back pa e por economicamente y socialmente e por tin un miho biba na su pais. Nos mester percura pa cuida nos frontera y naturalmente e imagen di pais Aruba turisticamente.”

Fuente: http://www.diario.aw