(Aruba) Gobierno a stipula un plan cu CITGO hunto cu Valero pa finalmente logra reapertura di refineria

E tema di posibel reapetura di refineria ta keda un topico di dia. Na San Nicolas y rond di Aruba ta pendiente pa mas noticia positivo. Ya caba e ta bayendo hopi bon y e speranza ta cu e minister logra concretiza tur loke e ta haciendo.
Segun minister Mike de Meza, CITGO ta un compania cu tin hopi experiencia, experticio, profesionalismo y financieramente nan ta un compania solido. CITGO ta un compania cu ta produci 750.000 bari pa dia, nan tin 6.000 diferente stacion di gasolin y 60 waf pa barconan descarga of carga loke tin di haber cu combustible y crudo.

CITGO su contribucion ta sumamente grandi den tur e diferente lugar nan unda nan ta opera, Lake Charles, Lemont y Corpus Christi.

Despues di a reuni cu CITGO y a firma un MOU, como parti di e ‘due diligence’ un delegacion ta yegando Aruba unda cu un eco-team y ehecutivonan di Valero conhuntamente cu Gobierno lo haci evaluacion nan den e parti tecnico, huridico y economico.

Pa CITGO e intencion ta pa conclusion di evaluacion ta positivo ta pa tin tur cos, tur tanki di crudo y producto, full operacion di refineria y tambe duna e servicio di local marketing, gasolin, diesel, kerosin y jet fuel cu lo worde bendi localmente.

Gobierno a stipula un plan cu CITGO huntu cu Valero, pa fin di luna di november mester tin un indicacion di tur e informacion cu a worde haya, conclusion nan preliminario y cu un decision lo worde tuma pa fin di aña. Siguiente fase, si ta positivo, ta caba e contrato y pa CITGO tuma refineria completemente over, Gobierno di Aruba ta bay ta involucra totalmente, un proceso hopi huridico cu ta parti di e afrondingsprocess.

For di principio di discucion preliminario e interes di CITGO ta pa ta activo pa mas cu 20 aña. Pa e parti di inversion CITGO tin diferente plan y CITCO tin e capital pa haci esaki y nan conoce nan mesun capacidad como un compania solido. CITGO ta un di e 6 companianan mas grandi na Merca den e industria di petrolio, number un den e parti di complexidad, conversion for di azeta pisa, azufre y acido.

Unabes inversionan grandi worde haci, bo tin industria pa termino largo, 4.000 pa 6.000 cupo di trabao, un empuhe den bo economia di 100 miyon Florin pa aña anualmente, esaki ta los di inversion nan grandi cu bo ta haci manera cu bo rehabilita e planta y e consumo diario di equipo y material den e refineria.

E ta importante pa e situacion financiero y situacion economico, pa caha di Gobierno historicamente e ta trece mas cu 125 miyon Florin anual, e ta un impacto hopi grandi pa bo economia y situacion financiero di bo pais pero tambe e parti socio economico di tur hende na Aruba. Un cos cu ta laga un famia sinti bon ta, cu tin trabao, y cu na fin di dia por pone pan ariba mesa. Nos tur sa cu refineria a contribui grandemente den esaki, tin hobennan cu a bay studia internacional, tecniconan, accountants, operators, inspectors, bo tin tur tipo di cupo di trabao den un refineria directamente via compania mes y contratistanan pero tambe indirectamente e “spin off” di un refineria ta grandi den tiendanan, y hasta pa e monteur lo tin mucho mas trabao bou palo paso refineria tin un efecto grandi pa nos economia, Minister de Meza a termina bisando den un declaracion recien.

Fuente: http://www.diario.aw