(Aruba) Casi 300 ilegal Venezolano buscando Asilo Politico trempan na DIMAS

Diahuebs mainta trempan un cantidad di casi 300 persona ilegal na Aruba a yega na porta di DIMAS. Algun di nan mas cerca di e porta tabata tey for di 4or di marduga. E motibo di nan presencia ta pasobra nan kier Asilo Politico. Nan ta di Venezuela y e situacion cu nan ta pasando aden pa cria nan famia a pone cu nan a bandona e pais.

Nan mes a tende via via sea via Whatsapp of otro manera cu ta yudando Venezolanonan na Aruba ilegal cu asilo. Pesey mes casi 300 a presenta for di marduga. A tende cu e dia anterior caba tabata tin basta hende. DIMAS tabata man na cabez cu e situacion.

Buscando informacion a tende cu ningun hende a haya Asilo. Mas bien e cantidad di hende cu ta presenta ta un documento of formulario nan ta haya pa yena nan datos. Esnan cu tabata pafo tin dos luna, tres luna, cinco luna, un aña y hasta tres aña ilegal na Aruba. Pesey mes tur a bay para pa mira un chens.

CEA a pidi refuerzo di seguridad pa presenta cu mas hende. E multitud tabata trankil y nan sa cu nan mester tin pasenshi. Polis tambe a bin pa e momento cu CEA a habri porta. Esnan cu tabata tin cita a haya preferencia pa drenta. Esey tabata un cantidad masha chikito. Djey e prome grupo grandi di ilegal a drenta.

A papia cu varios di e ilegalnan y nan mes ta expresa cu nan situacion no ta facil. Nan ta move rond pa logra haya un trabou aki aya y asina gana algo pa biba aki y manda tambe un poco placa pa nan famia cu ta pasando dificil na Venezuela. E directora di DIMAS a garantiza cu ningun hende a haya Asilo Politico. Gobierno mes a tene un conferencia di prensa pa splica kico ta e situacion.

Fuente: https://www.diario.aw