(Aruba) Pueblo ta reacciona riba posible entrada di refugiadonan Venezolano na Aruba

Pa Mercedes Monge. Pueblo di Aruba a cuminza reacciona riba posible entrada di 500 refugiado Venezolano na Aruba, y cu lo prepara centro di acopio na Santa Cruz y Dakota pa nan.

Esaki a haci cu varios habitante di ambos area a cuminza yama na nos mesa di redaccion pa duna nan opinion, ademas di otro ciudadanonan en general.

Mester bisa cu mayoria di nan tin temor, y incluso, un ciudadano a expresa cu esaki por trece un reaccion den pueblo por ehemplo, un manifestacion masal contra e bishitantenan inespera aki.

Tin hopi aspecto cu algo asina ta encera. Na prome lugar e pregunta ta, ta ken ta bay cria nan? Cuanto placa gobierno lo mester inverti den e construccion di e shelternan, acomodacion pa nan no drumi riba vloer, alimentacion, etc., etc?

Aparentemente, Hulanda ta obliga Aruba pa tuma nan. Ta Hulanda anto, lo core cu tur e gastonan aki?

Y fuera di e aspecto logistico encuanto gasto y cu nos pais mes ta pasando den un crisis economico- financiero basta pisa, ta bin e factor social. Semper cu tin exodo di hende cu ta huy di nan pais, ta sali for di dje hende bon pero tambe hende cu mal intencion. Esey ta un hecho!

Ya Aruba ta enfrentando cu criminalidad creciente. Ta ken por garantiza cu e entrada di tanto Venezolano asina, no ta un forma di importa tambe mas delincuencia?

Y sigur nan ta bin cu yiunan. Lo habri tambe e oportunidad di educacion pa e muchanan cu ta bin acerca? Pasobra den Derecho di Mucha ta para cu e mucha tin derecho riba educacion.

Na Aruba mes, tristo pa bisa esey, tin un cantidad di mucha cu no a haya scol e aña escolar aki, segun informacion cu mayornan mes ta aportando nos.

Pues, pa ley no por nenga nan no ta nada si ta pa seis luna so, cu hopi hende akinan ta duda. Mas ainda, tin hende ta pensa y sinti cu nan no ta bay kier abandona Aruba despues!

Y e aspecto di cuido medico, na unda ta keda? Ken ta bay para responsable pa docter y remedi ora nan bira malo? Ta nos mes como pueblo ta bay paga, pasobra no ta gobierno ta esun cu tin e placa, ta pueblo ta paga pa tur proyecto y desaroyo cu ta den man di gobierno. Ta nos mes cu nos impuesto.

Un tema y situacion sigur delicado. Dificil hasta pa sinta skirbi di dje. Nos ta papiando di sernan humano cu ta huy di un dictadura, pero nos ta papiando tambe di sernan humano local, Arubiano y residente, cu ta integra un pueblo trahador cu kier pa e problemanan cu nos Isla tin wordo resolvi, cu kier biba den paz y armonia, cu kier hisa su nivel di bida, y cu ta sinti cu esaki no ta e momento oportuno pa bira e bon Samaritano, tanten cu no a cuminza na nos mes cas, na nos mes.

Gobierno tin un batata cayente den su man cu e decision aki. Di un banda e bon obra di caridad, y di otro banda un pueblo temeroso cu ta expresa un biaha mas “no tin cama pa tanto hende” pero cu no tin e libertad di bisa NO, pasobra ta Hulanda ta bisa SI, y nos gobierno mester acepta, guli, manda abao!

Y e reaccion aki di varios ciudadano ta debi cu no ta mustra cu esnan cu ta bin ta personanan profesional, cu por huur of cumpra un vivienda, of aporta di algun manera na nos pais. Personanan asina aki sigur lo bin keda den shelter.

Pero asina mes, personanan bon studia y bon prepara ta rekeri di haya trabao, y ta secreto publico den voz halto, cu nos mercado laboral ta satura hasta pa nos mes profesionalnan.

E temor di nos pueblo ta cu si Venezuela ta exporta pobreza y problemanan, ta bay contamina nos Isla cu mas problema social y tambe resto di nos Continente!

Fuente: http://www.diario.aw