(Aruba) Ocho aña di prison exigi pa 7 latino gara cu mas cu 1.100 kilo di cocaina

Diabierna mainta den sala di Corte, 7 latino procedente di Honduras, Venezuela y Santo Domingo, a scucha Fiscal exigi 8 aña di prison pa cada un. Fiscal ta haya nan tur mesun culpable pa e importacion, exportacion y posecion di 1108,80 kilo di cocaina cu tabata abordo di e barco Oceanic 1.
ACUSACION:

E acusacion di Fiscal contra e hombernan J.F.E., J.A.L., A.H.R., M.R.M., C.G.G., L.C.P., A.C.M. ta cu riba 4 Maart 2015, nan a importa, exporta y tabatin cantidad grandi di droga cu nan. Fiscal ta considera nan complice di importacion di 1108,80 kilo di cocaina.

GUARDA COSTA A LOS TIRO:

Hues a bisa cu segun e procesverbaal, Guarda Costa dia 4 Maart 2016 mas o menos 12.30 merdia a haya informacion cu abordo di e barco Oceanic 1, ancra den awa teritorial di Aruba, posiblemente tin droga abordo. Door cu e barco ta navega bou di bandera Hondureño a pidi Gobierno di Honduras permiso pa por aborda y haci investigacion riba e barco.

Pa mas o menos 4 pm e barco a cuminsa navega. Guarda Costa a navega bay na e barco y a duna e capitan orden pa bay waf di Aruba. E capitan no a haci caso y a sigui navega. Miembronan di Guarda Costa e momento ey a mira cu tripulacion di e barco a benta un bulto den laman. A pisa esaki y …. bingo. E tabata droga. Guarda Costa a bolbe duna orden na e capitan pero atrobe e no a haci caso. A mira hende ta tira mas bulto. A los dos tiro di advertencia. Esey a pone cu e capitan a para e barco y Guarda Costa a aborda. A bin haya 34 bulto, 6 bulto a worde benta den laman. En total 41 bulto. Investigacion a mustra cu e bultonan aki a pisa 1108,88 kilo di cocaine y a keda confisca.

BARCO TABATA WARDA CARGAMENTO DI DROGA:

E capitan di e barco, J.F.E. a declara cu nan a navega na Januari 2016 y tabata ancra net na e frontera di Aruba. Na Maart 2016 dos boto a yega y un tabata yena cu bultonan. Tur e tripulantenan a yuda pone e bultonan abordo di e barco Oceanic 1. E otro boto tabata eschoolta e boto cu tabatin e droganan. Segun J.F.E., el a haya yamada di su yiu mainta y despues un otro hende a contesta kico e lo bay haci. E ta considera esaki como menaza cu si e no coopera pa pone e droga abordo, lo tuma represaya contra su famia.

E tripulante J.A.L. a bisa cu e tabata traha riba e barco pero a kita pasobra nan a keda tres luna sin paga. Despues el a bolbe worde yama pa bay back y ora yega Honduras e lo worde paga e lunanan atrasa. Nan tabata traha cu turno y ora el a tuma su turno, el a mira bultonan tapa. El a puntra capitan kico eseynan ta y e capitan a bisa cu esey lo keda eynan. Mainta el a mira Guarda Costa y el a bisa nan tur cos pasobra e no tin nada di sconde.

R.M. tabata polizonte abordo y ta despues di algun dia el a worde descubri y el a bisa cu e no tabata sa di nada. Hues a remarca cu otronan ta bisa otro. G.G. a bisa cu un homber a bis’e pa subi boto pa bay na e barco. E tabata sospecha cu ta droga. El a navega e boto na e barco y e boto ey lo worde poni riba e barco. El a bisa cu ora Guarda Costa a yega, el a yuda benta bultonan den laman.

C.M. no a papia nada. El a bisa Hues cu e tabata polizonte y no tin nada di bisa.

MENAZA DI FAMIA:

J.F.E. a bisa Hues cu mirando cu nan a menaza su famia, e no kier pa despues cu e sinta su castigo, nan deporte pa Honduras. El a bisa cu esnan tras di e droga lo bay tuma represaya contra dje asina e yega Honduras. Hues a puntr’e si e sa kendenan ta tras di e droga. El a bisa Hues cu e no por menciona nomber. Awor e ta un pia na bida y un pia morto. El a bisa cu esnan tras di e droga ta kere cu intencionalmente nan a haci cu e droga a worde haya pasobra nan sa cu e tripulacion no tabata di acuerdo pa transporta droga.

EXIGENCIA DI FISCAL:

Fiscal ta haya legalmente proba cu e grupo aki ta culpable di importacion, exportacion, posecion di un lote grandi di cocaine. E barco Oceanic 1 desde Januari 2016 tabata den awanan teritorial di Aruba. Dia 4 Maart 2016, Guarda Costa a worde notifica cu e barco a ricibi cargamento di droga. E mesun dia e barco a cuminsa navega pa sali for di awanan teritorial di Aruba y esey Fiscal ta considera exportacion di cocaine.

Fiscal a bisa cu como prueba e ta usa declaracion di e capitan cu a duna claridad cu el a worde menaza pa tuma e lote abordo. E otro tripulantenan mester a yuda pone e droga abordo. Dos boto a yega e barco y cu kraan un di e botonan a worde hisa abordo y a descarga e bultonan. Despues e boto a worde baha back den laman. Guarda Costa a ordena e capitan pa drenta waf pero e no a haci caso. A bay asina leu cu a tira bulto den laman. Guarda Costa a los tiro di advertencia y abordo di barco a haya bultonan di cocaina. Ta mas cu 1.100 kilo di cocaine a keda confisca.

Pa cu castigo, Fiscal ta haya cu tur a traha hunto. El a bisa Hues cu e ta tene cuenta cu e cantidad di droga y tipo di droga. Ta parce cu e capitan kier tuma responsabilidad riba dje pero Fiscal a bisa cu e no kier haci diferencia den funcion.

Fiscal a bisa cu e ta tene cuenta cu seriedad di e caso. Ta trata aki di traficacion organiza di un cantidad hopi grandi di cocaina. Na opinion di Fiscal, mirando e cantidad grandi, e droga aki ta destina pa otro paisnan grandi. El a mustra cu droga ta causa hopi miseria y criminalidad.

Fiscal a exigi 8 aña di prison pa cada un. Tambe el a exigi pa destrui tur e droganan. Fiscal a splica Hues cu pa loke ta e barco cu a transporta e droga, a busca na Honduras y e compania di aseguro a bisa cu nan sa cu e barco ta confisca. Na opinion di Fiscal, e doñonan di e barco no kier identifica nan mes pasobra nan lo sa kico a pasa. Fiscal a pidi confisca e barco y cu Gobierno lo por bende esaki pa cubri e gastonan di unda e boto ta para.

Hues a mustra cu ya caba e droga a worde destrui. Fiscal a confirma esey pero no tin un decision oficial.

DEFENSA ABOGADONAN:

Mr. Faarup a bisa cu e barco Oceanic 1 tabata mara net na e frontera wardando informacion pa navega bay un waf pa worde manteni. Na dado momento nan a haya informacion cu tin dos boto ta trece cos. E capitan y dos otro tripulante no kier a participa den esaki. Ta asina cu tin tres tripulante a bandona e barco ora e botonan a yega. Ningun hende sa kico a pasa cu e tres tripulantenan aki. Nan no sa si nan a worde tira den laman.

E abogado a ilustra pa Hues e situacion cu su clientenan tabata aden. Nan ta riba un barco y no ta cuestion cu bo ta bula na awa y landa bay tera. Bo lo hoga. Nan no tin ningun otro opcion cu sigui orden cu a haya bou menaza. Ta asina cu e capitan mes, ta un di e tres cu a bay for di e barco. E momento ey J.F.E. a bira e capitan. E abogado a conclui cu e no ta haya cu ta intencionalmente a trafica den droga. Nan tin lunanan sin haya salario. Kere cu mester declara nan liber.

Abogado mr. Zara a bisa cu e ta compronde ponencia di Fiscal cu ta trata di traficacion di droga pero no ta comparti e exigencia di castigo di 8 aña di prison. Tabatin algun a dicidi di bay for di e barco. Mustra cu C.M. ta un polizonte y no tin nada di haci cu e caso. G.G. tambe ta bisa cu e ta polizonte. E abogado ta haya cu no por papia aki di complice. Abogado ta haya cu nan tabata den un situacion cu no por haci nada. E ta haya exigencia di Fiscal demasiado halto. Abogado mr. Zara a pidi Hues pa declara nan liber y si toch ta haya nan culpable, su tres clientenan no tabatin e funcion di traficador.

Hues a bisa cu 11 Juli pa 2’or di merdia lo dicta sentencia.

Fuente: http://www.diario.aw