(Aruba) Gobierno a prohibi importacion di webo Venezolano

Gobierno di Aruba a tuma un decision diahuebs ultimo dia 21 di april, relaciona cu importacion di webo di galiña for di Venezuela. Esaki a bin despues cu for di e sector primario di nos pais a surgi critica pa e hecho cu ta importando webo Venezolano cu nan ta bende cu supermercadonan bou di e prijs stipula pa Gobierno, cu ta ocasionando hopi problema den mercado.

Specialmente minimarket y supermercadonan Chines ta cumpra e webo Venezolano mesora pasobra e ta haci cu nan margen di ganashi ta dobel compara cu ora cumpra di criadonan di galiña local of importa esunnan procedente for di Merca.

E reto mas grandi ta e medidanan di higiena cu ta aplica na Venezuela na momento di exporta e webonan pa Aruba. Contrario na esunnan di Merca cu ta yega den containernan friu, esunnan di Venezuela ta bin riba barconan chikito di fruta y berdura y como tal hopi biaha ta sea bin daña of ta daña masha lihe, cu tur consecuencia cu e por tin ora come.

De facto, Gobierno Venezolano a prohibi exportacion di productonan primario for di e pais, pues tur esunnan cu ta trece webo Aruba for di Venezuela ta actuando ilegal. Cu e realidad ey riba mesa, Gobierno di Aruba a dicidi pa no duna dispensacion pa importa webo for di Venezuela y riba dje a subraya cu no ta permiti pa importa ningun webo di galiña cu no ta yega den friu, sin importa di cua pais el a sali.

E decreto gubernamental aki, AB 1989 GT # 13, ta firma dia 21 di april 2016 dor di Minister di Asuntonan Economico, Comunicacion, Energia y Medio Ambiente, Ing. Mike de Meza. Cu esaki e ora Duana lo mester aplica e decision y nenga entrada di webonan cu ta yega sea di Venezuela of sea ta yega riba barconan cu no tin freezer of un forma pa mantene e carga friu.

Di otro banda, ta bon si pa criadonan di galiña local cuminsa identifica nan cahanan di webo tambe, pa asina clientenan cumprando webo por distingui facilmente cua webo ta local y cua ta importa di afo.

Asina nos hendenan por sostene nos propio sector primario mas ainda.

Djis bende webo den un caha sin nomber, sin nada, no ta e miho forma tampoco. Pasobra e cahanan di webo Venezolano ta mesun cos, pues ta bira masha dificil pa distingui cua webo ta di Aruba y cua ta di otro pais.

Fuente: http://www.diario.aw