martes, 16 de octubre de 2018

(Aruba) Economia den zona di peliger na 2015

Durante e ultimo lunanan, mientras documentonan importante ta mira luz y ta facilita e proceso di comparacion esencial pa yega na conclusion, DIARIO a presenta informacion na comunidad Arubano cu mester comprende pakico austeridad ta necesario.
DIARIO a mustra con decisionnan a ser tuma sin tene cuenta cu aspectonan basico importante durante ultimo añanan.
E momento a yega pa determina si e interes di Aruba a ser vigila na forma apropia den pasado.

2015 tabata un aña importante pa Aruba cu tabata den un situacion sumamente delicado. E situacion financiero di e pais tabata hopi malo. Hulanda a interveni pa evita un situacion di cual ciudadanonan lo a bira victima.

Na 2015, Aruba tabatin tur motibo pa ta den panico. Na Venezuela situacion a bira alarmante. Vigilancia tabata necesario pa planifica futuro di Aruba. Un vigilancia cu si por descubri di parti di instancianan independiente manera investigacion di DIARIO ta demostra.

TURISMO A EXIGI VIGILANCIA

Relatonan di instancianan oficial ta mustra cu nan tabata consciente di e peliger cu e desaroyonan Venezolano tabata contene pa Aruba.

Den e relato di Banco Central di Aruba encuanto economia na 2015 “State of the Economy 2015”, por lesa cu na 2015 cantidad di turistanan cu a pasa anochi na Aruba a conoce un crecemento di 14.3 porciento. Esaki pa motibo cu e cantidad di turista Venezolano cu a keda na Aruba a crece cu 66.3 porciento.

E Venezolanonan no a bin Aruba pa descansa pero tabata señal di un situacion grave na Venezuela, cu a pone nan bin lanta nan placa deponi na banco van Venezuela.

Den e relato di Banco Central a bin dilanti cu e cantidad di turista cu a bin for di Venezuela por a subi, pero cu esaki no por a ser uza como argumento positivo pa turismo for di Venezuela.

E Venezolanonan tabata pasa un anochi na Aruba pa despues sigui pa otro pais. E resultado tabata cu a registra mas turista cu a bishita Aruba pero e cantidad di anochi cu nan a pasa, no a subi pero a baha.

Si e estadia cortico a resulta den cifranan mas abou pa duracion di estadia, tabatin mas informacion cu mester a conduci na mas vigilancia y cautela.

E ocupacion di hotelnan a baha y tabata debi tambe na e hecho cu un grupo grandi di turista Venezolano no tabata bay keda na hotel pero na otro acomodacionnan mas barata.

NA 2015 PESIMISMO A REINA

Den e “State of the Economy” di 2015 pesimismo ta bin dilanti. Economia no tabata crece. Consumidornan tabata pesimista y no tabatin un bista positivo di futuro.

Segun e investigacion cu Banco Central a haci pa determina kico ta biba cerca e consumidor, 32.2 porciento di personanan acerca a bisa cu nan situacion posicion financiero personal a bay atras.

Na 2014 unicamente 27.2 porciento a trece esey dilanti.

Un averahe di 53.1 porciento di negociantenan a haya cu nan negoshi a bay atras compara cu 43.9 e aña anterior. 71.1 porciento di personanan acerca a bisa cu nan condicion di trabou a bay atras durante ultimo seis luna.

70.2 porciento a considera cu ta miho pa no haci un fiansa. Na fin di 2015 e cantidad a baha na 69.3 porciento.

Inversionnan a baha na 2015 den un panorama di pesimismo cu a afecta henter economia.

Manera DIARIO a presenta na diferente ocasion, den e panorama aki e debe nacional a sigui crece pa percura pa un situacion financiero preocupante.

2015 ta e antesala pa 2016 ora Aruba ta cera un acuerdo pa refineria cu mester bira e salbacion economico .

DIARIO ta referi na publicacionnan anterior riba introduccion di e refineria cu mester a bira rescate di Aruba for di un problema financiero y economico serio.

Fuente: https://www.diario.aw ->> Ir

No hay comentarios:

Publicar un comentario

Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.

 
LO + LEÍDO...

LO + LEÍDO...