(Aruba) PPA disgusta con acuerdo cu Citgo ta insulta trahadornan local

E siman aki, Benny Nisbet di PPA a mustra con e hecho cu Gobierno a permiti contratista importa su mesun Heavy Equipment, ta insulta trahadornan y companianan local. Pero no esey so. Segun Nisbet, e acuerdo cu Citgo tambe ta insulta trahadornan local.

PPA no por keda sin trece e acuerdo aki dilanti na e momento aki!

Den e acuerdo aki a worde firma cu ora ta trata trabao directo bao di Citgo, esaki lo ta 80% local y 20% Internacional.

Pero ora ta trata trabao indirecto of di Contratista a firma y parlamento 20-1 a aproba cu bao di e contratistanan esaki lo ta 80% di exterior y 20% local.

Esaki durante 15 aña y posiblemente por worde expande cu diez aña extra.

Segun PPA, esaki tambe ta trapa nos derecho como pueblo, trapa nos dignidad y nos honor.

Mientras tanto pueblo y contratista a tuma esaki relativamente keto, pero ora e momento yega cu lo confronta esaki lo ta laat.

Aruba mester lanta pa defende nos derecho como pueblo nos dignidad y nos honor.

PPA ta condena esaki un vez mas, y segun Nisbet, nan ta di opinion cu Gobierno di AVP mester duna instruccion pa e ‘trucknan’ aki regresa Peru bek.

Fuente: http://www.diario.aw