(Aruba) Compania Repsol a duna luz berde pa sigui explora Gas na Aruba

Dialuna atardi cu caracter di urgencia Gobierno di Aruba a yama un conferencia di prensa pa asina anuncia un grato noticia cu nan a ricibi. Rondona di varios Minister, Premier Mike Eman a cuminsa na anuncia cu esaki ta un informacion cu ta sumamente importante pa e futuro di pais Aruba y alaves e perspectiva y e desaroyo pa nos pais.

Un informacion cu a yega durante weekend informal caminda Gobierno di Aruba a bin ta traha hopi duro pa e reactivacion di e Compania Petroleo Arubano cu ya caba tabata existi pero no tabata mucho activo.

Bao dirigencia di Minister Mike de Meza y esnan cu ta representa e Compania Petroleo Arubano a dicidi pa duna bida nobo na e actividadnan na e Compania Petroleo Arubiano pa busca un manera pa presenta na mundo e oportunidad pa busca un compania pa explora e posibilidad nan pa Gas den e subsuelo aki na Aruba.

E compania Repsol y Total tabata esnan cu a mustra mas interes pa explora e posibilidad di busca Gas aki na Aruba. E Prome y segundo fase pa explora Gas den nos Subsuelo ya a tuma lugar caba, y tabata pending pa realiza e tercer fase. Sinembargo e tercer fase no a wordo anuncia inmediatamente, mirando e prijs di petroleo rond mundo a pone cu ambos compania a pone e tercer fase on hold. Awe durante e conferencia di Prensa, Prome Minister Mike Eman a anuncia cu e green light a wordo duna pa inicia e tercer fase.

Sigur esaki ta un tremendo noticia pa Aruba. E tercer fase ta uno sumamente importante pa Pais Aruba, mirando cu esaki lo ta un inversion cuantioso cu e compania ta bay inverti pa asina explora e posibilidad pa haya gas aki na Aruba. Realidad ta, cu ningun compania lo no bay inverti miyones den nos Pais pa explora gas, si nan no tabata convenci cu e posibilidad pa encontra Gas na Aruba ta hopi grandi.

E decision aki ta pone cu Pais Aruba lo carga un speranza enorme, mirando cu e resultado di e Prome y Dos Fase a bay sumamente positivo, y awo e mesun companianan aki cu ta reconoci rond mundo pa na experticio di Explora Gas den nos subsuelo, un biaha mas ta pone confianza den nos pais y ta cla pa inverti miyones pa inicia un capitulo hopi importante awo relacion cu exploracion pa encontra Gas.

Fuente: http://www.diario.aw