CITGO ya caba a nombra nan director general

Alvin Koolman tabata traha na Surinam unda cu e tabatin un contracto te cu 2018 pero a entrega su retiro entrante prome di augustus. E compania na Surinam tabata kier a extende e contracto aki te cu 2020, pero el a bisa cu e no por haci ambos trabou na mesun momento.

E ultimo seis lunanan, e tabata haci mita tempo na Aruba y e ultimo dos lunanan na tempo completo. Y e no por a sigui di e forma aki. Surinam a compronde cu e proyecto di e refineria ta importante pa Aruba y cu e isla mester di su experticio.

Por a compronde cu algun contratista local a wordo aserca y algun hasta a biaha pa Houston pa combersa cu CITGO cu kier a evalua nan capacidad. CITGO ta negociando caba cual lo bira e contractista principal den e trabou di refurbish di e refineria y esaki mester keda cla prome cu nan por contracta hende local. No ta cualkier compania por haci un trabou di 700 miyon florin. Ta un compania grandi mester haci e trabou aki pa CITGO.

E contracto cu CITGO tin un validez di 15 aña. E parti di renobacion ta dura 3 aña pa despues e operacion mes por cuminsa. Den 18 luna e prome plantanan mester ta cla. Esaki ta nifica cu CITGO ta bin cu su team di maneho. Ya nan a nombra e director general di e refineria cu ta Alidio Zambrano, kende ta guia henter e proyecto di CITGO na Aruba y poco-poco nan ta bin cu hendenan local, acopla cu nan hendenan experto.

Fuente: http://www.diario.aw