Fabrica di Rom kier bin habri na Aruba

Un grupo masha selecto di conocedo y fanatico di bon likeur a reuni na ocasion di un anochi presentacion y prueba di Rom Diplomatico na Aruba.

E encuentro cu a tuma luga na un residencia priva na Seroe Blanco caminda a conta cu presencia di e Master Blender di e marca, Sr. Tito Cordero ademas di e propio President di e compania Destilerias Unidas S.A., Sr. Jose Ballesteros.

Siguiendo cu e expansion di e mercado, e compania ta pone su wowo riba e Free Zone di nos isla como un opcion hopi atractivo pa drenta e mercado di no solamente e region Caribense, pero tambe Europa. Na Aruba e representante di e compania y marca aki ta e conocido Franz Sydow, desaroyado di e proyecto hotelero Isla di Oro.

Cu mas di 55 aña di experiencia, Destilerias Unidas S.A. ta productor di e rom Diplomatico cu actualmente ta obtenibel na mas di 50 pais rond mundo. Tanto e compania como su producto a bira merecedo di premionan internacional di hopi prestigio.

Na 2013 a ricibi e Rum Barrel Award na e London Rum Fest como e Miho Destileria di Rom na Mundo. Na 2014 Ron Diplomatico a bay cu dos medaya di oro na e di 6th China Wine & Spirits Awards den e categoria di Miho Balor pa su productonan Diplomatico Reserva Exclusiva y Diplomatico Ron Añejo.

Riba e anochi Sr. Cordero, kende tin 24 aña di experticio y a keda premia na 2013 como Master Blender di Aña na e London Rum Fest, a duna na esnan presente un splicacion detaya di e proceso cuidadoso di seleccion di ingrediente, fermentacion, destilacion, embehecemento y te hasta mescla di e romnan Diplomatico.

A introduci e dos liña di Rom Diplomatico, esta e Tradition y e Prestige. Tradition ta combina e estilo Hispano, Americano y Britanico di traha rom y ta conta cu tres modelo, e Diplomatico Reserva di 8 aña, e Diplomatico Blanco Reserva y e Diplomatico Reserva Exclusiva.

Di su banda, Diplomatico Prestige ta e liña traha for di e reservanan mas exclusivo y produci den cantidadnan limita. E ta consisti di e Diplomatico Single Vintage cu ta data for di e aña indica su boter (p.e. 2001) y e Diplomatico Ambassador Selection cu tin un minimo di 12 aña.

Destilerias Unidas S.A. y Rom Diplomatico ta spera di pronto por concreta esfuersonan pa su establecimento na Aruba. Nan ta kere den e futuro economico di e isla, ta comparti e vision den tereno di exportacion y e pasion pa calidad.

Fuente: http://www.diario.aw