(Aruba) Turistanan Venezolano cu no por Swipe mas awor a haya un triki nobo

Tin hopi forma pa bo yega Roma! Esey parce di ta loke e turistanan Venezolano cu ta bin Aruba cu intencion di haya Dollars cash, ta inventa pa logra nan meta.

Awor cu na Aruba, Banconan a adverti comerciantenan pa stop cu e tipo di “Swipe” carchi djis pa turistanan haya Dollars, y cu hasta 80 POS-Machine a ser kita… e situacion a bira mas dificil.

Banconan a indica cu e tipo di Swipe aki por wordo categoriza como “fraude”. Algun comerciante cu a bin ta haci esaki regularmente, hasta a perde nan POS-Machine di Banco.

Pero e POS-Machine tin di wordo usa como transaccion pa compra di algo, y no pa Cash Advance.

Esey a pone cu den ultimo simannan, comerciantenan a stop inmediatamente cu e asunto di Swipe pa Dollars cu e turistanan Venezolano.

Pasobra e Turistanan Venezolano kier haya Dollars cash, pa regresa Venezuela unda riba mercado paralelo, nan lo haya monton di Bolivares pa esey.

Con nan a logra pa haya e placa? DIARIO a haya sa cu turistanan a busca un forma nobo pa haci esey.

Aki por mira con nan a drenta un Supermarket grandi, y a cumpra como US$1.000 na cervez. Nan a swipe dos credit-card pa haci esaki.

Cu garoshinan yen-yen cu e caha di cervez nan a sali pafo unda comerciantenan chikito tabata spera riba nan, y a cumpra aki e cahanan di cervez over di e turistanan. Fuente a splica DIARIO cu nan a haci esaki pa como US$800.

Pues nan a cumpra legitimamente $1.000 na producto, y pafo a bende e productonan ey na $800. E cumpradornan pues a spaar $200, y alavez esey ta parti di nan comision.

Y e Venezolanonan? Nan lo regresa nan pais cu $800, unda riba e mercado paralelo esaki ta igual na 626.000 Bolivares.

Fuente: http://www.diario.aw