(Aruba) Un hotel na Aruba a hera perde un deal pa un serie di convention balora na mas di mei miyon dollar

Nos bieunan semper a uza e proverbio, “Macaco ta hunga cu su yui te ora e saca su wowo,” pa pone atencion riba e riesgo di keda busca peligro te ora cu causa un desgracia. Diahuebs ultimo un grupo di manifestante, cu sosten di politiconan di MEP, a causa un destruccion bergonsoso riba edificio di Parlamento di Aruba. Practicamente tur bentana dilanti y na banda di e edificio a keda destrui cu baranca, bloki y boter.

Tin reportahenan te hasta cu a los tiro. A bolter un ‘light tower’ cu su generator di DOW (balora entre 10 pa 20 mil dollar), tira gasolin riba dje y cende na candela. A kibra un borchi electronico cu panelnan solar cu ta duna señal banda di e zebrapad dilanti di Parlamento di Aruba. A bay asina leu cu a tira gasolin riba dos boter di gas di un edificio un poco mas pariba di Parlamento cu afortunadamente a brandweer a logra controla.

Aunke cu esnan responsabel a haci esaki pa motibonan politico y instiga pa otronan, loke nan no a realisa cu nan ta hungando cu nan mesun pan. Loke ta haci e asunto aki mas peligroso, cu no ta unicamente nan pan nan a pone na peliger, si no pan di cada famia riba Aruba.

Den bisindario di Parlamento tabata tin hopi turista hopi spanta y cu probablemente no ta bay scoge pa bolbe nos isla mas. Na un hotel den area di “high rise”, a surgi un problema ora cu un Convention Booker a presencia e destruccion diahuebs ultimo. Na e hotel en cuenstion, e persona aki tabata encarga di cera un deal di US$ 500,000.00 pa un serie di conventionnan cu lo mester tuma luga na e hotel. “I thought you told me Aruba was safe,” tabata su palabranan ora cu el a cuminsa combersacionnan cu personal di e hotel. E empleadonan di e hotel mester a cuminsa un ‘damage control’ pa motibo cu e booking agent tabata hopi preocupa pa trece un cantidad grandi di su clientenan Aruba.

Na final a logra convence e persona aki cu e sucedido no ta algo cu ta pasa regularmente na Aruba. Pero mirando cu e partido politico tras di henter e destruccion aki ainda ta papia di mas violencia, protesta y te hasta un paro nacional, sector hotelero ta hopi preocupa cu e consecuencianan cu esaki por tin pa turismo na Aruba.

Ora cu Sr. Dangui Oduber ta papia di turismo, semper e ta papia den e contexto cu mester lo miho pa Aruba, pero awo cu e ta parti di e destruccion, violencia y kimamento, nos ta puntra nos mes si e tin interes di Aruba su turismo na pecho!

Si tuma Corsou como ehempel, aunke cu e no ta mucho leu for di Aruba, ni di bonaire, nunca nos isla ruman por a desaroya un industria turistico grandi manera Aruba of substancial manera esun di Boneiro. Esey tin di haci cu e violencianan na aña 1969 cu a crea un persepcion den exterior cu Corsou ta peligroso y no ta apto pa turismo. Apenas awo, Corsou ta progresando poco poco den turismo.

Y awo na Aruba tin algun persona ‘politiekverziekt’ cu ta kere cu nan por kima, destrui y experimenta cu un paro nacional! Aruba su turismo ta na peliger!

Fuente: http://www.diario.aw