martes, 30 de octubre de 2018

(Aruba) CITGO y e splicacion cu mester duna pueblo

Mientras na Aruba tabata parce cu nada espectacular tabata sosode, bista di mundo financiero y petrolero internacional tabata fiha riba e compania cu na 2016 a ser introduci na Aruba como e gran salbacion economico di e pais.
Venezuela mester a dicidi con e ta paga e debe di PDVSA di casi Un Biyon pa asina evita cu CITGO ta cambia di doño. Na 2017 el a haya ayudo financiero di Rusia, cu awor a manda “conseheronan” Venezuela pa restructura e maneho financiero di Venezuela, cu a anuncia cu e lo paga e debe di CITGO.

A keda demostra atrobe cu pueblo di Aruba no ta realisa e nubianan scur cu tin ariba e refineria cu no a habri su portanan e aña aki manera e acuerdo a stipula. Pago di e casi un Miyon mes no ta deshaci di e peliger pasobra manera DIARIO a proba, ta hopi compania ta bringa pa haya e algo mas cu mita di loke a resta di CITGO na Merca.

CITGO no tabata un compania liber ora Aruba a yega na un acuerdo cu e compania di estado Venezolano na 2016. E tabata ya mara na e parti cu ta den man di e compania petrolero di Rusia ora Aruba a firma e acuerdo y ta solamente ora Venezuela paga e debenan enorme cu e tin na Rusia, por bisa cu CITGO ta di PDVSA realmente. Kico lo pasa despues di ayera, ta otro storia.

E otro parti di CITGO por ser confisca dor di Crystallex, un compania minero cu Venezuela debe placa, manera Hues na Merca a dicidi.

Esaki ta nifica cu CITGO no ta un asunto cu si awor Venezuela tin un biyon pa hinca den e reapertura di e refineria di Aruba of no. Pa e proyecto bira realidad na Aruba, Venezuela mester por pone placa riba mesa of haya un pais dispuesto pa mas prestamo.

Ademas, Venezuela mester por paga e prestamo cu PDVSA a cera cu CITGO como garantia di pago. Si Venezuela no paga e prestamo cu ta vence na 2020 segun e acuerdo cu el a alcansa cu tur cu ta inverti nan placa, Venezuela ta perde e parti mas grandi di CITGO. Rusia ta conoci cu e realidad aki.

Ora a firma e acuerdo di CITGO na 2016, ta riesgo hopi grandi a tuma. A introduci un fantasma legal na Aruba.

A introduci un acuerdo cu por hinca Aruba den un problema sumamente grandi si Aruba trata na stop e proyecto.

Ora a firma e acuerdo na 2016, a bay di acuerdo cu si CITGO sinti cu e ta ser stroba den su operacion , e por bay Hues contra Aruba cu a kita e mercado di productonan petrolero refina for di Valero y a entrega e negoshi na CITGO.

Esaki ta nifica cu e compania di PDVSA, di estado Venezolano, a haya e mercado Arubano pa bende su productonan pero no a cumpli cu e acuerdo. Si el a cumpli cu e acuerdo, awe Aruba lo a conoce reapertura di e refineria.

Aruba mester aplaudi pa e contracto cu un riesgo di tal magnitud? Aparentemente Gobierno anterior cu a firma e acuerdo cu un tono victorioso, ta pensa cu pueblo mester baila pasobra e loke Aruba lo mester paga nunca por ta mas cu 300 Miyon Dollar.

Di e forma aki Gobierno anterior kier a evita tambe cu otro gobernantenan lo por a stroba e refineria di keda den operacion. Ora analisa e parti aki ta conclui, cu gobierno anterior tabatin mas miedo di politiconan Arubano cu e tabatin di e situacion financiero desastroso di Venezuela y PDVSA cu tabata haci prestamo rond mundo.

Gobierno anterior tabatin mas miedo di politiconan di Aruba cu e tabatin di Rusia cu tin casi mita di CITGO den su man y cualkier momento por bende. Gobierno anterior tabatin mas miedo di politica local cu e tabatin contra e hecho cu cualkier momento CITGO por a haya otro doño.

Gobierno anterior tabata asina sigur di loke el a haci, cu e no a permiti Parlamento como representacion di pueblo tuma nota di e acuerdo cu CITGO.

Awe Pueblo di Aruba mester haya e splicacion cu democracia ta exigi pa duna pueblo, cu Gobierno Mike Eman a mara na CITGO contra tur conseho local y internacional.

Minister Presidente Wever-Croes e aña aki a entrega e acuerdo den su totalidad na Parlamento. Awor mester splica pueblo kico a pasa cu e refineria y Aruba cu ta den un situacion hopi serio.

No hay comentarios:

Publicar un comentario

Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.

 
LO + LEÍDO...

LO + LEÍDO...