(Aruba) Minister Glenbert Croes: Anuncio di Citgo ta inaceptabel

Den pasado minister Glenbert Croes tabata critico riba e asunto di refineria. A bin un anuncio cu no lo tin consecuencia pa e trahadonan directo, pero si pa e trahadonan di contratista. Nan lo tin cu kita hende pasobra no lo bay tin trabao awor aki mientras tanto. Como minister di Labor, sr. Croes a splica cu p’e ta inaceptabel. Como minister di labor, e anuncio cu Citgo a haci ta inaceptabel, pa e consecuencianan cu ta bay tin pa e trahadonan directo of indirecto di e contratistanan. E ta convocando reunionnan riba dje cu caracter di urgencia pa e explora ki responsabilidad e tin, ki autoridad e tin, ki deber e tin pa loke ta e trahadonan cu ta traha pa Citgo y e trahadonan cu ta traha pa e contratistanan di Citgo.
Den cuadro di esey, como minister di labor, su tarea ta defende e trahadonan. E ta kere cu e no lo ta asina facil ni pa Citgo y ni pa e contratistanan di Citgo, pa zomaar kita trahadonan for di trabao, bao di circunstancianan cu nan ta den. Slow Down no ta Shut Down.

Si Citgo por a hinca 100 miyon dollar durante Gobierno di AVP, Citgo por hinca 100 miyon dollar pa mantene e trabao di nan propio fondonan, continuando pa por mantene e trahadonan na trabao. Ta bay poco poco, ban poco poco. Pero no por ta asina pa ta dispuesto pa inverti 100 miyon dollar durante gobierno di AVP como Citgo y durante Gobierno di MEP/POR/RED no ta dispuesto pa inverti 100 miyon dollar.

A rais di e reunionnan cu e minister lo tin awe, e lo bay tuma un decision a base di kico ta su responsabilidad, autoridad y deber como minister di labor pa e trahadonan di refineria directamente y indirectamente, tambe pa e trahadonan di e contratistanan, pa e sali na defensa cabalmente pa protehe nan trabao. Atrobe, nos ta biba na Aruba. No ta zomaar bo ta kita un trahado for di trabao.

ESFUERSO
Minister Glenbert Croes tey pa defende interes di trahado. E proyecto di refineria ta cay bao di minister di energia, kende alabes ta minister presidente. E no tin duda cu meta di e gobierno ta pa e refineria habri. Pero e realidad ta cu ta Citgo mester haci inversion. Esey ta e acuerdo cu tin cu Citgo. Tarea di minister di labor ta, protehe e potencial di generacion di cupo di trabao pa tur ciudadano na Aruba y sigura cu trahadonan local y contratistanan local haya preferencia. Riba su mes, Croes no tin mas e libertad manera antes. E no tin libertad riba su mes y riba su propio caminda manera antes, haci esfuersonan paralelo loke su propio gobierno ta haciendo. E tin confiansa cu prome minister di Aruba, como minister di Energia, lo haci su maximo esfuerso pa sigura cu e interes di Aruba y e interes tambe di e trahadonan wordo sigura y cu den cuadro di e trahadonan, como minister di labor, Croes lo eherce e tareanan pa sigura pa ni Citgo y ningun contratista kere cu awe bo ta emplea un trahado y bo ta kere cu mañan bo por kit’e. Ta na Aruba nos ta biba. Cu tur humildad, e minister su meta ta, pa defende tur trahado di Citgo, tur trahado di e contratistanan den Citgo, y naturalmente tur sector. Pesey e ta minister di labor.

GLENBERT CROES: MI NO TIN E LIBERTAD PA DEAL CU CITGO MAS

Contrario na antes, unda Glenbert Croes tabatin contactonan directo cu top di PDVSA na Venezuela y a interveni na mas di un ocasion, awor aki e no por mas. Den pasado hasta partido MEP a felicit’e cu ta danki na dje refineria a habri na Aruba. Pero awor cu ta momento di reto, Gobierno no ta dunand’e e chens pa sali padilanti y deal direct cu e refineria. E ta masha straño pasobra si ta Glenbert Croes tin tur contacto, lo ta mas facil pa e cay den e crisis aki.

Awe durante un entrevista cu 24ora.com, e mandatario a corda cu tempo e tabata Parlamentario, e tabata bula bay Caracas y eynan deal cu e Venezolanonan di PDVSA y asina via su contactonan, pusha pa e refineria bin habri na Aruba. Den campaña el a uza CITGO como un di su temanan principal, a atende cu e contratistanan y a move masha pa pusha e proyecto aki.

“Pero awor mi no tin e libertad ey mas”, asina el a bisa awe. “Mi no tin duda cu meta di nos Gobierno ta pa e refineria habri”.

Mas leu el a aclaria cu como Minister di Labor su autoridad ta cuminsa y caba na asuntonan laboral. Pues e no tin e autoridad, ni e mandato di Conseho di Minister, pa cana dilanti den e negosacionnan cu e refineria riba nan financiamento y e proyecto completo di rehabilitacion di e Refineria di Aruba.

“Mi no tin e libertad manera antes, riba mi mes, riba mi propio camindanan, haci esfuersonan paralelo loke mi propio Gobierno ta haciendo. Mi tin confiansa si cu Minister di Energia lo haci su maximo esfuerso pa sigura trabou di e trahadonan”, asina e mandatario a vocifera, mandando un señal directo na Minister Presidente Wever cu a opta pa no duna Croes e cartera di Energia, pero cu den menos di 100 dia ta haye cu un batata basta cayente pa resolve.

Fuente: http://24ora.com