miércoles, 17 de enero de 2018

(Aruba) Kizas e momento a yega pa Aruba “ranca e plug” di refineria Citgo

Kico e decision di President Nicolas Maduro pa kibra tur conexion aereo y maritimo cu islanan ABC lo por nifica pa e futuro di Refineria Citgo na Aruba? Loke sea por deduci di esey, e principal ta cu bo no por castiga bo islanan bisiña asina!! Venezuela ta castigando Aruba, siendo e isla aki pa colmo ta preparando pa yuda PDVSA haya un upgrader den nan red.

Esey ta e danki cu Aruba merece di Venezuela? Ta cuanto tempo mas tin di warda pa e refineria aki habri anto? Di berdad ta dura 2 aña pa por rehabilita un refineria pa e funciona bek atrobe? E momento a yega pa Aruba kizas bisa: “The deal is off”.

Un ex-trahador di Refineria a yega di bisa esaki cla y raspa: “Dia cu mi mira huma sali for di e planta, e ora porfin mi ta convenci cu Refineria di Aruba a habri bek”.

Y e tin razon! Pasobra ya caba na como 7 diferente ocasion, Gobierno anterior a pone “fiesta” pa festeha e apertura di refineria di Citgo na San Nicolas. Hopi fanfaria, hopi musica, y bebemento.

E ultimo “fiesta di apertura” cu nan a tene riba parkinglot di Arubus na San Nicolas, a faya barbaramente. El a ‘backfire’ debi cu pueblo su wowo a cuminza habri. Pueblo ta mirando cu nada ta pasando. Tur hende cu a bay inscribi na Citgo Desk, a keda sin haya trabao. Siendo cu nan ta mira cu di Venezuela si a bin varios trahador… y hasta compania di Venezuela a haya contract cu normalmente ta companianan Arubano tabata haya.

Y awor cu ta dia 17 di Januari 2018.. e pregunta primordial ta bira: Di berdad Aruba tin di sigui biba bao di e smokescreen aki y kere den e sprookje di Citgo su refineria funcionando bek?

For di comienzo caba tin hopi cosnan eroneo cu a socede cu e proyecto aki. Incluyendo e forma con Parlamentarionan mes a wordo laga den scuridad ora cu nan a pidi pa mira e deal cu Citgo.

E centenares di trahadornan cu a acudi na Citgo Desk y cu a keda decepciona, tambe por bisabo con disgusta y totalmente frustra nan ta con e compania ta tratando yiunan di tera.

Tur e storia di beauty and the beast aki ta cuminza duna indicacion cu e ta coriendo mesun rumbo cu e desastrenan di garantia hoteleronan di decada di 1990 cu a costa Aruba miyones.

Y ya caba varios persona ta cuminza mustra nan mes di ta convenci cu e aventura di Citgo pa Aruba ta hole den un claim cu e futuro yiunan di nos lo tin di paga. Ta wordo hasta menciona e suma di $150 miyon.

Pa colmo ultimo dianan tabata circula e rumor cu e corporate office di Citgo Petroleum kier a realoca pa Aruba. Esaki a wordo mira door di hopi como un intento ainda pa laga cierto hendenan keda ‘happy’ na Aruba.

Sinembargo prensa di Houston (Texas) a sorprende tur hende e comienzo di siman aki, cu bao ningun circunstancia e corporate office lo muda pa Aruba. “Citgo says it will keep its headquarters in Houston”.

Tin di corda cu Citgo Aruba tin nada di haber cu Citgo USA. Unico cos cu nan tin comun, ta e mesun doño/accionista, esta PDV Holding.

Sinembargo e desaroyonan rond di PDVSA ultimo lunanan di 2017, a spanta hopi hende na Aruba. Ora cu na November recien, como 6 ehecutivo halto di Citgo y tambe PDVSA a keda deteni na Venezuela, acusa di ta envolvi den actonan di corupcion.

Tur esaki ta pone bo haya e impresion, comosifuera desde Mei 2016 caba Aruba ta ocupa tur e tempo ey ta deal cu suhetonan pa asina pone e refineria cuminza opera. Awor cu nos ta casi 2 aña despues, ainda e movimentonan riba tereno na San Nicolas ta minimo.

Pesey mes, pueblo di Aruba no ta kens mas! Pesey mes pueblo a briya cu su ausencia ora cu a tene Fiesta #7 riba e tereno di Arubus, unda solamente invitadonan so a goza di premium drinks y pasaboca gourmet.

Por corda tambe e promesa di ex-Ministro De Meza, cu a bisa cu boca grandi cu e deal cera cu Citgo ta uno di 80/20. Pues ta percura pa 80% di e trahadornan y companianan cu wordo contrata ta di Aruba, y e resto 20% ta di exterior.

Sinembargo e 80/20 aki nunca a bira realidad. Hopi tristo mes.

E implicacion moral di ta negocia cu e suhetonan aki ta suficiente motibo kizas pa Gobierno di Aruba djis ranca e plug. Shutdown e refineria, cu pa colmo a shutdown hopi tempo pasa caba!

Gobierno anterior a permiti e suhetonan aki pa haci negoshi na forma mahos, pues cu documentonan scondi, yen di gañamento, y awor aparentemente a haci corupcion y horta tambe y pesey varios ehecutivo ta deteni na Caracas.

Y lo peor di tur cos? E compania madre PDVSA no tin ni 25 cent den su cartera! Nan no sa tampoco kico nifica, gasta placa pa upgrade of mantene un facilidad Y e actitud di President di Venezuela, Nicolaas Maduro riba Diabierna dos siman pasa pa cera tur comunicacion aereo y maritimo cu Aruba, ta suficiente motibo pa e isla aki laga tur cos para, y bira lomba y laga nan.

Pasobra full e deal aki ta hole stinki di comienzo!

Tur e noticianan negativo rond di Citgo e ultimo lunanan, ta suficiente pa Aruba su gobernantenan cuminza brainstorm cu wowo mas critico y skerpi, basando nan mes riba cifranan y e desaroyo politico mundial, y tuma un decision.

Si acaso awor caba President Maduro kier haci dificil y tira tur culpa di ‘contrabando’ riba Aruba y no ta haci nada di su banda pa stop e mercancia sali di su puertonan.. kico e lo haci si acaso un dia e refineria habri mes.

Mensahe di e President ta cla y raspa! E ta wordo mira tambe como un survey di dje, pa mira cuanto poder e tin riba islanan ABC, y cu placer e kier mira e gobernantenan di e islanan aki, plus Hulanda, bay na rudia su dilanti.

Den pasado tempo cu Exxon a cera su porta, ya caba Venezolanonan tabata yama e refineria di San Nicolas como un “viejo cafetera”. Nan tabata mire como un Coffeemaker bieu.

Kizas nan tin razon di yame un Cafetera bieu? E tempo a yega awor na 2018 pa check na un forma dinamico, un otro meta pa e tereno di refineria na San Nicolas. Kizas e por bira un Datacenter gigantesco pa Apple? Of kizas pa Microsoft of hasta Google? Aruba lo por beneficia di ta conecta na e top di submarine data cables cu Zuid America.

Awor pa colmo tin tambe e movimento nobo pa crea fabrica nobo di bateria pa energia renobable. Kizas aki por pensa riba un oferta na e compania Tesla pa habri un fabrica di nan mundialmente famoso bateria na Aruba? E fabrica lo tin su mesun Waf pa asina exporta nan pa Zuid America.

FUENTE: Con información de https://www.diario.aw

No hay comentarios:

Publicar un comentario

Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.

 
LO + LEÍDO...

LO + LEÍDO...