(Aruba) Companianan ya a cuminza move pa traha riba e tubo di gas di Venezuela pa Aruba

Tin un trabao tremendo cu tin cu tuma luga pa caba cu e liña di gas prome cu e prome cuartal di 2018. Ya tin companianan experto riba ponemento di tubonan di gas den e caso aki riba tera y bao di lama segun Minister Mike de Meza.
Riba tera na Venezuela, for di e parti di Cardon, Punto Fijo, te na e partinan di mas halto di Paraguana, e ta un distancia di ongeveer 80 kilometer riba tera. For di momento cu e ta bay den awa pa Aruba, nan ta calcula cu ta un 30 kilometer cu lo bay core.

E ta bin ariba riba e tereno di Citgo, e refineria na Aruba y tur e plantanan lo worde cambia den e plan cu tin cu worde ehecuta, for di uza e azeta pisa cu semper tabata worde uza, pa gas natural, cu ta algo sumamente bon.

A discuti eynan tambe e posibilidad cu WEB lo por bay over tambe pa cambia su fuel y bay riba gas natural. A mira e otro posibilidadnan tambe cu e transporte publico por ehempel, pero tambe transporte en general lo por bay e ora ey riba gas, cu ta hopi mas limpi pa medio ambiente, pero tambe e ta mas barata cu gasolin, diesel, etc.

Esey tambe ta posibilidadnan y den futuro lo por pone suministro di gas via tubonan cu ta yega na cas, mescos cu den paisnan hopi grandi, desaroya, por ehempel un Hulanda, pero cu esey tambe ta e plan pa den futuro. Esey ta nifica cu ta uza e gas e ora y den futuro, si mester uza e gas di Aruba mes of LNG, tin e infrastructura pa WEB y e casnan residencial y comercio na Aruba y transporte pa bay riba esaki.

E tabata topiconan sumamente interesante.

Minister de Meza a splica cu no ta topiconan cu ta worde papia, pero ta riba papel caba caminda cu e fondonan necesario di Citgo tambe ta disponibel caba. E trabaonan ta bay mira nan ta tuma luga y ta tumando luga caba. Awor aki tin preparacion y lo mira esaki tuma luga. Tabata hopi interesante pa por a discuti e topiconan aki na Caracas.

Como parti di e delegacion tabata tey tambe minister Paul Croes, pero tambe cu director di companianan di Utilidad di Aruba, kendenan tabata sr. Frank Hoevertsz y tambe director di refineria di Aruba, kende ta un experto riba e tereno di petroleo, refineria, gas, kende ta sr. Alvin Koolman. Hunto a discuti e diferente topiconan aki y tabata tin mas topico tambe, pero sumamente interesante. Nan ta sumamente contento con e reunionnan a bay.

E compromisonan cu tin pero tambe e partinan factual cu ta riba mesa, claridadnan cu a worde duna, plan total di e parti laboral, e trahadonan, con e proceso di tuma hende na trabao ta bay. Na tur momento nan a bay di acuerdo cu e delegacion cu esunnan prome yama pa e gran parti di e trabaonan, ta nos localnan na Aruba y esey ya caba ta tumando luga.

Esey ta keda e concentracion tambe. Na momento cu no tin persona pa haci e trabaonan door di experiencia, educacion y disciplinanan, e ora semper tin e espacio cu lo mester trece hendenan experto di pafo y esey tin su proceduranan tambe. E reunionnan a bay sumamente positive.

Fuente: http://www.diario.aw