CITGO Aruba ta “slow down” proyecto di rehabilitacion di e refineria

Di parti di CITGO, DIARIO a ricibi e comunicado di prensa aki unda ta bisa cu “CITGO Aruba, un grupo di compania cu ta opera bou di PDV Holding Inc., mester slow down su proyecto planea di rehabilitacion di e refineria na San Nicolas pasobra e sancionnan di gobierno Mericano pa cu e shareholder Petroleos de Venezuela, S.A. (PDVSA) no ta permiti financiamento adicional pa e proyecto.

“CITGO a cuminsa e proyecto di rehabilitacion di e refineria di San Nicolas cu un vision y compromiso firme pa traha cu gobierno di Aruba pa crea trabou pa e economia local, hisa actividad economico y contribui na seguridad den area di energia den e region”, asina Jim Cristman, Vicepresidente di Refinacion pa CITGO a bisa.

“Maske ta cu duele nos mester slow down e proyecto pa e proximo tempo, nos ta trahando duro riba un solucion y ta spera di por resumi cu full e proyecto den futuro cercano.” Den colaboracion cu gobierno di Aruba y Refineria di Aruba N.V. (RdA), CITGO Aruba ta trahando desde 2016 pa habri e refineria di 209.000 bari pa dia (BPD) cu ta for di produccion desde 2012.

A pesar di e anuncio di awe, ya e proyecto aki a resulta den construccion di un man camp pa 1.200 trahador y a emplea mas di 600 trahador. “Nos ta orguyoso di e progreso cu nos a logra caba y ta desapunta cu nos mester slow down e trabou”, Cristman a sigui bisando. Gobierno di Aruba y RdA a traha den bon cooperacion cu nos den e esfuerzo aki”.

Fuente: https://www.diario.aw