(Aruba) Venezolanonan na Aruba cu accion di protesta pa libertad y husticia dilanti Consul Venezolano

Dialuna mainta a tuma lugar un accion di protesta dilanti di Consulado Venezolano, unda cu varios Venezolano cu ta biba na Aruba a presenta pa mustra Gobierno di nan pais cu nan ta cansa di e sufrimento cu ta tumando lugar.
Representante di esnan den protesta Maite Delgado a splica DIARIO cu e accion ta uno di luto y protesta y un grito pa libertad y husticia y pa bida di e hobennan na Venezuela cu tin e derecho di pensa diferente.

“Nos tin e derecho di pensa diferente”.

“Despues di 18 aña di un Gobierno cu tabata tin tur cos, cu tabata tin e apoyo di un pueblo y tur e placa, a keda bon cla cu e no a hasi un bon trabao”.

“Quizas esaki debi na ineficiencia, of pasobra Gobierno mes no tabata kier, pero hecho ta cu Gobierno no a hasi un bon trabao y punto”.

Enlace Relacionado...
- Maite Delgado protestó en el consulado de Venezuela en Aruba

Esaki segun señora Delgado, kende a sigui bisa cu Venezuela tin mester di biba mihor y cu e yiunan di tera ta reclamando esaki.

“Nos yiunan tin un curashi cu ta spantami, pasobra ta un pelea entre David y Goliat”.

“Nos yiunan ta sali cu escudonan di carton y sin camisa pa bringa contra tur e represion militar y contra tur e forza di un Gobierno miyonario”.

“E realidad ta cu nos no ta bringando contra un pais, sino contra su Gobierno, pasobra nos tur ta Venezolano”.

Esaki segun Delgado, kende a sigui bisa cu e grupo a presenta dilanti di Consulado Venezolano no pasobra nan tin algo contra e hendenan cu ta traha eynan.

“Cada un di nan lo tin nan consenshi y mi ta sigur cu nan ta tende e gritonan di silencio tur anochi”.

“Nos ta akinan awe cu un actitud pacifico y sin violencia”.

DIARIO a puntra e representante di e grupo cu si e situacion ta asina malo, con por ta cu cada biaha e pueblo ta vota pa e Gobierno actual.

Señora Delgado a bisa cu e tabata desea di tin e contesta pa e pregunta ey.

“Sinembargo, e pregunta ta, di berdad e hendenan ta vota?, pasobra loke nos kier ta pa vota, pero e derecho ey nan ta nenga nos”.

“Nos kier vota cu un Conseho Nacional Electoral cu ta imparcial, nos tin esaki?”

“Nos kier defende nos leynan cu un tribunal supremo di husticia imparcial, nos tin esey?”.

“E unico cos legal cu nos tin ta e Asamblea Nacional cu a wordo eligi pa mayoria di e votadornan na Venezuela den un votacion abrumador, pero nan a respeta nos?”

“Nos a uza tur e mecanismonan cu e constitucion ta duna nos pa tene un referendum di revocacion cu por a wordo resolvi atravez di un eleccion…nan a respeta nos?”

Esaki segun Delgado, kende a sigui bisa cu Gobierno a cera tur e camindanan electoral pa nan y pesey como ciudadano desarma ta nan deber di reclama.

“Nos arma ta nos palabra”, segun e representante di e manifestantenan.

“Nos ta gradici pueblo di Aruba cu nan a acepta nos”.

“Mi ta compronde cu ora nos ta hopi esaki por genera un tipo di miedo, pero nos ta bin cu bon actitud y cu bon intencion”.

Señora Delgado a puntra cu awor cu ta bay tin eleccion na Aruba, con pueblo lo pensa si Gobierno di Aruba hasi manera esun di Venezuela y cuminza tira bom y los tiro riba hende.

El a splica cu recientemente un mucha di apenas 14 aña a wordo tira mata na Venezuela durante manifestacionnan contra Gobierno na Barquisimeto.

“Segun mi e mucha, Brian Jimenez, no tabata ni manifestando”.

“Mi no por imagina con su mama Diadomingo riba Dia di Mama y riba tur otro dia lo sinti, pasobra mi tambe ta mama”.

“Ken ta bay dune bek Brian? y ken ta bay duna bek na cada mama e yiunan cu nos tur ta representa akinan?”.

Fuente: Con información de https://www.diario.aw - Agencias